तानसेन नगरपालिकाले फोहोर फाल्दै आएको वनदेवी क्षेत्रबाट सल्केको डढेलो दुई किलोमिटर क्षेत्रमा फैलिएको डिभिजन वन कार्यालयका प्रमुख नारायणदेव भटराईले जानकारी दिए ।

निस्दी, माथागढी, तानसेन नगरपालिका, तिनाउ, रैनादेवी छहरालगायतका स्थानीय तहका जंगलमा केही दिनयता डढेलो फैलिएको छ । डढेलो नियन्त्रणमा स्थानीय उपभोक्ताको खासै चासो नदेखिएकाले जंगलमा जतासुकै डढेलो फैलिएको हो ।

निस्दीको ज्यामिरे, मित्याल, माथागढीको गोठादी, रहवास, बहादुरपुर, तिनाउको झुम्सा, दोभान, कचल, तानसेनको पिपलडाँडा, रैनादेवी छहराको जुठापौवा, सत्यवती लगायतका स्थानमा डढेलो लागेको छ ।

बढ्दो खडेरीसंगै जिल्लाको सामुदायिक र सरकारी जंगलमा लागेको डढेलोले हजारौं हेक्टर जंगलका काठ, दाउरा, जडीबुटी तथा नयाँ पालुवा जलेर नष्ट भएको छ।

पाल्पाका ३८ वटा सामुदायिक वनमा जिल्लाभर डढेलो लाागिरहेको छ भने ३५ वटा सामुदायिक वनमा नियन्त्रणमा आएको छ । ६ सय हेक्टर जंगलमा डढेलो लागिसकेको डिभिजन वन कार्यालयले जनाएको छ । जिल्लामा ७ सयभन्दा बढी सामुदायिक वन उपभोक्ता समूह छन् ।