बुटवल । भनिन्छ, दुर्घटना भवितव्य हो । कति दुर्घटना प्राकृतिक हुन्छन्, कतिपय चालकले गरेको लापरबाहीका कारण दुर्घटना हुन्छन् । त्यहि कारण धेरैले अकालमा मृत्यु वरण गर्छन ।
कोही त्यस्ता चालकहरु पनि हुन्छन् जो, आफ्नो जीवनकालमा कुनै पनि मानविय र भौतिक क्षति विना ‘सफल चालक’ बन्छन् । त्यस्ता ‘सफल चालक’ औलामा गन्न सकिने हुन्छन् । त्यहि मध्येका एक हुन, रुपन्देही देवदह ५ खैरेनीका विष्णु कार्की । जसले सवारी चालाएको ४९ बर्ष भयो ।
बुटवलको राप तापले तताउदै गरेको सडकमा रातो ज्याकेट र शिरमा ढाका टोपी, पकेट वाला हाफ जागे लगाएका रुपन्देहीको देवदहका विष्णु कार्की अघिल्लो साता बुटवल बसपार्कमा भएको एक कार्यक्रममा भेटिए ।
लामो समय देखि सवारी चालक पेशामा आबद्ध भएका कार्की उक्त कार्यक्रममा सम्मानित बने । कुनै पनि मानविय र भौतिक क्षति नगरी सुरक्षित, अनुशासित र मर्यादित यात्रामा पुराएको योगदानको कदर गर्दै सुरक्षित यात्रा नेपाल बुटवलले उनलाई सम्मान गरेको थियो ।
४९ बर्ष सम्म सवारी चालक बनेका कार्की संग धेरै अनुभव छ । कहिले सरकारी साधन, कहिले बस, कहिले ट्रक चलाएका कार्की पछिल्लो समय आफ्नै सवारी खरिद गरेर चलाउने गरेका छन् ।
४९ बर्ष पहिले बुटवल–नेपालगञ्जको सवारी चलाएका कार्कीले त्यहि सवारी बाट आफ्नो जीवनका सुख खोजे । त्यसपछि भने ३३ बर्ष ट्रक चलाए । पुर्व मेचीदेखि पश्चिम महाकाली सम्म ट्रकबाट सामान ओसारपोसार गरे । केही समय दाङ–काठमाडौं रात्रिकालिन बस पनि चलाए ।
‘कहाँबाट सुःख मिल्छ भन्दै धेरै सवारी फेरेर चलाए । अहिले भने आफ्नै जीप चलाउने गरेको छु’ उनले भने ।
१५ बर्ष देखि अहिले आफ्नै जीप चलाउँदै आएका विष्णु कार्की सवारी लाईनमा ‘कार्की बा’ का नामले चिनिन्छन् । उनले सवारी साधन चलाउँदा नारायणीमा पुल थिएन । बुटवल बाट काठमाडौं जान पोखरा हुँदै जानुपर्ने अवस्था थियो ।
विगत सम्झदै कार्की भन्छन्–‘अहिले गाडि चलाउन धेरै सजिलो छ । गाडि हाईडोलिक छन् । औलाले घुम्ती काट्न सकिन्छ । त्यो बेलाका सडक कस्ता थिए । गाडि पनि उस्तै । घुम्ती काट्न कुनै कुनै ठाउँमा त सह चालकको सहयोगमा ह्यान्डल बर्टान पथ्र्यो’ उनले भने ।
प्रविधिको विकास संगै सवारी साधनमा बढि सुरक्षित हुने उपकरणहरु जडान भएका छन् । हाइडोलिक सवारीका कारण दुर्घटना हुनबाट सजिलै बच्न पनि सकिन्छ । तर यति हुँदा हुँदै पनि दिनानु दिन भइरहेको दुर्घटना बाट कार्की अचम्ममा छन् । उनी भन्छन्–‘पहिले भन्दा धेरै स्तरिय गाडि भएपनि दुर्घटना पहिलेको तुलनामा झन बढेको छ । सडक पनि फराकिला र चिल्ला भएपनि दुर्घटना बढ्ने गरेका छन्’ उनले भने ।
कार्कीको ४९ बर्षे सवारी चलाएको अनुभवमा दुर्घटनाको मुख्य कारण चालकको लापरबाही हो । चालककै कारण ९० प्रतिशत दुर्घटना हुने र प्राकृतिक एवं भवितव्य दुर्घटना जम्मा १० प्रतिशत हुने गरेको उनले बताए ।
‘बाटो फराकिला हुँदा चालकले स्पीड कुदाँउछ । त्यति मात्र होईन, मादक पद्धार्थ सेवक गरेर पनि सवारी साधन चलाउँदा दुर्घटना हुने गरेको छ’ उनले भने ।
चलक सचेत भए नेपालमा दुर्घटनाको संख्यामा कमि आउने उनी बताउँछन् । ‘आफ्ना नजिक बोल्ने मानिस राख्ने, ध्यान सडकमा भन्दा कुरामा हुँदा पनि दुर्घटना हुने गरेको छ । केही दुर्घटना मात्र ब्रेक फेल भएर, टायर फुटेर भएका छन् । तर चालक जिम्मेवारी भए दुर्घटना कम हुन्छ’ उनले भने ।
४९ बर्ष सम्म सवारी चालक बनिरहेका कार्की आफ्नो पेशाबाट सन्तोष छन् । घर परिबारले पनि खुसी मानेकै छन् । ‘पहिला जस्तो थिए, अहिले पनि त्यस्तै छु । तरपनि सन्तोष छु । जति गरेपनि खाने लाउने हो । खान पाएको छु । नांगो शरिर ढाक्न पाएको छु’ उनले भने ।
सवारी साधन चलाउँदा ठाउंठाउंमा यात्रुले दिने माया पनि उनको सम्झनामा ताजै छन् । कतिपय यात्रुलाई गन्तव्यमा पुराए पनि धन्यवाद नपाएका उनी पछि जाँदा सम्मान पाएको उनी सम्झन्छन् । पाल्पाको फोक्सिन कोट जाँदा, प्युठान जाँदा पछि पनि धेरै फुल मालाले सम्मान पाएको उनले बताउँछन् ।
‘यात्रुको माया पछि सम्म पनि पाईने गरेको छ । यात्रुले अप्ठयारा परिस्थितीमा सजिलै गन्तव्यमा पुराएको क्षणलाई सम्झेरै पछि सम्मान गरेको हुनुपर्छ’ उनले भने । उकेराबाट साभार