उनले लालपुर्जा प्राप्तिका लागि उपमहानगरपालिकाले भूमि आयोगसँग निरन्तर सहकार्य गरिरहेकाले बाँकी रहेका ब्लकहरू छिटै नै नापजाँचको प्रक्रियामा जाने बताए।

नगरप्रमुख पाण्डेयले अहिले वडा नं २, ११ र १२ का जग्गाहरूको नापजाँचको प्रक्रिया सुरु भएको र छिट्टै लालपुर्जा प्राप्तिको प्रक्रियामा अगाडि बढाउने बताए ।

वडा नं २ का करीब ३ सय घरधुरी, ११ का करीब ४ सय घरघडेरी र १२ का करीब १ सय २० घरधुरीको नापजाँच अगाडि बढेको बुटवल उपमहानगरपालिकाका भूउपयोग तथा भूमि व्यवस्थापन शाखाका प्रमुख विजयदेव भुर्तेलले जानकारी दिए । उनले डीजीपीएस सर्भे सम्पन्न भएपछि नापजाँचको काम गर्ने र भूमि आयोगमा सिफारिस गरेर पठाएपछि लालपुर्जा प्राप्तिको प्रक्रिया अगाडि बढ्ने बताए।

सर्भेमा बुटवल उपमहानगरपालिकाका ५ जना सर्भेक्षकहरू खटिएको र छिट्टै नै डीजीपीएस सर्भे पूरा गरी नापजाँचको काम सुरु गर्ने बुटवल उपमहानगरपालिकाका सर्भेक्षक त्रिदेव बुढाथोकीले जानकारी दिए ।