चैत्र ४ गतेदेखि सुरु हुने बाईसौं तिलोत्तमा गोल्डकपको खेल तालिका सार्वजनिक भएको छ ।
रुपन्देही जिल्ला फुटबल संघले आयोजना गर्ने प्रतियोगिताको उद्घाटन खेलमा रुपन्देही ११ र सुदूरपश्चिम ११ बीच प्रतिस्पर्धा हुने आयोजकले जनाएको छ । चैत्र ११ गतेसम्म हुने गोल्डकप प्रतियोगितामा दुई विभागीयसहित ८ टिमको सहभागिता रहने जिल्ला फुटबल संघका अध्यक्ष लोक पुनले जानकारी दिए ।
खेल तालिका अनुसार चैत ५ गते हिमालय शेर्पा र थ्री स्टार, ६ गते एपीएफ क्लब र फ्रेण्ड्स क्लब, ७ गते मनाङ मस्र्याङदी क्लब र नेपाल पुलिस क्लबबीच प्रतिस्पर्धा हुने छ ।
त्यस्तै ८ र ९ गते सेमिफाइनलका खेल हुने छन् भने चैत ११ गते गोल्डकपको फाइनल प्रतिस्पर्धा हुने छ । प्रतियोगिताको बिजेता टिमले गोल्डकप संगै ११ लाख ११ हजार एक सय ११ रुपैयां नगद पुरस्कार पाउने छ । त्यस्तै उपविजेता टिमले ५ लाख ५५ हजार ५ सय ५५ रुपैयाँ पुरस्कार पाउने छ ।
प्रतियोगितामा सर्वोत्कृष्ट खेलाडीलाई एक लाख रुपैया वा एक थान मोटरसाइकल पुरस्कार प्रदान गरिने आयोजकले जनाएको छ ।
प्रतियोगिता अवधीभर उत्कृष्ट फरवार्ड, गोलरक्षक, मिड फिल्डर, डिफेन्स र कोचलाई समेत जनही ३० हजारका दरले नगद पुरस्कार प्रदान गरिने संघका महासचिव हिमाल गौचनले बताए । मोफसलमा सर्वाधिक पुरस्कार राशीको तिलोत्तमा गोल्डकप प्रतियोगिताको लागि १ करोड आठ लाख बढि खर्च अनुमान गरिएको छ ।
विगतका प्रतियोगिता भन्दा यसपटक पुरस्कार राशी समेत बृद्धि गरिएको र अन्य खर्च समेत बढेकोले बढि खर्च अनुमान गरिएको अध्यक्ष पुनले बताए । गोल्डकप प्रतियोगिताको २० औं संस्करणमा ७ लाख ७७ हजार ७७७ रुपैयां पुरस्कार राशी रहेकोमा २१ औं संस्करणमा पुरस्कार राशी बढाएर ८ लाख ८० हजार पु¥याईएको थियो । २०७५ सालमा सम्पन्न २१ औं तिलोत्तमा गोल्डकपको उपाधी विदेशी पाहुना टोली दाउफिन्स एफसि क्यामरुनले जितेको थियो ।
