बुटवल । व्यापारी संग बाट सुन नियन्त्रणमा ल्याइ आफै राख्दा निवास बाट सुन सहित पक्राउ परेका बुटवल ईलाका प्रहरी कार्यालयका तत्कालिन डिएसपी ठगबहादुर केसीले बदनियत अनुसार नै सुन आफैले राखेको खुलेको छ ।
साथै उनले नियन्त्रणमा लिएको सुन रितपुर्वक बरामद समेत नगरेको प्रहरीको छानविन बाट खुलेको छ ।
व्यापारीले ल्याएको सुन नियन्त्रणमा लिएर आफैले राखेको सूचना पाएपछि ११ पुसमा डिएसपी ठग बहादुर केसीलाई प्रहरीको केन्द्रीय अनुसन्धान व्यूरो सिआईबीले निवासबाटै सुन सहित पक्राउ गरेको थियो ।
त्यसपछि उनलाई निलम्बन गरी छानविन समिति मार्फत अनुसन्धान गरिएको थियो । उक्त छानविन समितिले डिएसपी ठगबहादुर केसीले सुन व्यापारीसंग रितपुर्वक सुन बरामद नगरेको र बदनियत राखेर आफैले लिन खोजेको निष्कर्ष निकालेको छ ।
साथै केसीबारे छानबिन गर्न गठित समितिले छानबिन पुरा गरि प्रहरी महानिरिक्षक धिरज प्रताप सिंहलाई प्रतिवेदन समेत बुझाएको छ । छानबिन समितिले सुन वैध भए फिर्ता गर्नुपर्ने र अवैध भए राजस्वमा बुझाउनु पर्ने भएपनि केसीले बद्नियत राखेको उल्ल्ेख छ । साथै उनले सुन बरामद गरेपछि प्रचलित कानुन बमोजिम गर्नुपर्नेमा डिएसपी केसीले आफ्नो पदीय दायित्व पुरा गरेको नदेखिएको उल्लेख छ ।
प्रहरी प्रधान कार्यालयका प्रवक्ता प्रहरी नायब महानिरिक्षक पोषराज पोखरेलले समितिको सिफारिस अनुसार थप अनुसन्धान र कारबाहीको लागी अब अख्तियार दुरुपयोग अनुसन्धान आयोगमा पठाउने निर्णय गरिएको बताए ।
गत मंसिरमा बुटवलका सुन व्यापारी किसन बिकको साथबाट ३६ तोला ३२ लाल सुन बरामद गरेपनि केसीले सुनको वैध वा अवैध के हो भन्नेबारे छानविनका लागि मुद्धा नचलाई आफैले राखेको सूचना पाएपछि प्रहरीको केन्द्रीय अनुसन्धान व्यूरो सिआईबीले केसीलाई निवासबाटै पक्राउ गरेको थियो । सिआईबीको टोलीले विकसंग बरामद गरेको सुन फिर्ता गर्न केसीले लिएको ८ लाख ५० हजार नगद रुपैयां र ९ लाख ५० हजार रुपैयांको चेकसमेत केसीको निवासबाट बरामद गरेको थियो ।
