पहिलो वर्ष जिल्ला समन्वय समितिको अगुवाइमा तानसेन नगरपालिका, तिनाउ, बगनासकाली, रिब्दीकोट गाउँपालिका साथै रूपन्देहीको देवदह नगरपालिकाको सहयोगमा ट्रयाक खुलेको हो ।

चुरे क्षेत्रको घना जङ्गलमा प्रारम्भिक वातावरणीय परीक्षणसमेत नगरी सोझै डोजर लगाएर ट्रयाक खोलिँदा यहाँ अत्यधिक पहिरो खस्ने समस्या आएको छ । झुम्सादेखि चौकी भञ्ज्याङसम्मको सात किलोमिटर क्षेत्रमा सवारी साधन गुडेपनि चौकीभञ्ज्याङदेखि चरङ्गेसम्मको आठ किलोमिटर सडक कन्त बिजोग छ ।

चुरे क्षेत्रमा डोजर लगाउादा सम्भाव्यता अध्ययन गरिएन । राजनीतिक खिचातानीमा सडक बनाउँदा कमजोर भू-बनोट भएको चुरेमा पहिरो खस्ने, जङ्गल मासिने, भूस्खलनको समस्या छ । नाली निर्माण, टेवा पर्खाल, पहिरो रोकथामका काम विफल भएका छन् । ठेक्का लागेको क्षेत्रमा हरेक वर्ष काम भएपनि वर्षाले पूरै सडक बगाएर उस्तै बनाउँछ ।

वर्षायामको पहिरोले चुरे क्षेत्रमा सडक भासिँदा तल्लो भेगका बस्तीसमेत जोखिममा छन् । पाल्पातर्फ पुल, कल्भर्ट निर्माण, ग्राभेल, नाली निर्माणको काम अघि बढेपनि चौकीभञ्ज्याङदेखि चरङ्गेसम्मको चुरे जङ्गल क्षेत्रको सडक नाजुक छ ।

चुरे पहाडबाट सडक बनाउादा प्रारम्भिक वातावरणीय परीक्षण गर्नुपर्नेमा त्यस्तो हुन सकेन । त्यसैले सामान्य पानी पर्दासमेत यो सडकमा सवारी साधन गुडाउन मुस्किल पर्छ । संघीय सरकारले सिद्धबाबा क्षेत्रमा सुरुङमार्ग निर्मार्णका साथै रकनेट, रकसेड गर्ने गरी ठेक्का लगाई काम अघि बढाएको छ ।