माओवादी संसदीय दलका नेता जोखबहादुर महराले आर्थिक मामिलामन्त्री, इन्द्रजीत थारुले भौतिक पूर्वाधार विकासमन्त्रीको रुपमा शपथ लिए । एमालेबाट विष्णु पन्थीले स्वास्थ्यमन्त्री, दुर्गाप्रसाद चौधरीले वन तथा वातावरणमन्त्री, तुलसीराम शर्माले कृषि तथा भूमि व्यवस्थामन्त्रीको रुपमा शपथग्रहण गरेका छन् । जनमत पार्टीका चन्द्रकेश गुप्ताले सामाजिक विकासमन्त्री र राप्रपाका जानकीप्रसाद यादवले उद्योग, पर्यटन तथा यातायात व्यवस्था मन्त्रीको रुपमा शपथ लिएका छन् ।

यसअघि नियुक्त भएका दुई जना मन्त्रीको जिम्मेवारी तोकिएको छ । एमालेका उपनेता चेतनारायण आचार्यलाई खानेपानी, ग्रामीण तथा सहरी विकास र माओवादी केन्द्रकी कृष्णा केसीलाई आन्तरिक मामिला, कानुन तथा सञ्चार मन्त्रालयको जिम्मेवारी तोकिएको छ । तर, केसी शपथग्रहण स्थलमा उपस्थित भइनन् । उनले बिनाविभागीय मन्त्रीबाट शनिबार राजीनामा दिएकी थिइन् । उनको राजीनामा स्वीकृत नगरी जिम्मेवारी तोकिएको छ ।

लुम्बिनी सरकारमा विश्वासको मत दिएका नागरिक उन्मुक्ति, जनता समाजवादी र लोकतान्त्रिक समाजवादी पार्टी सरकारमा सहभागी भएका छैनन् । मुख्यमन्त्री गिरीले शपथ लिएको ठीक एक महिनापछि मन्त्रिपरिषद्लाई पूर्णता दिएका हुन् । उनले पुस २८ मा शपथ लिएका थिए ।