बुटवलमा उपमहानगरपालिकाहरुको प्रथम राष्ट्रिय सम्मेलन हुने भएको छ ।
बुटवल उपमहानगरपालिकाको आयोजनामा माघ २१ र २२ गते प्रथम उपमहानगरपालिकाहरुको राष्ट्रिय सम्मेलन हुने भएको हो । उपमहानगरपालिकाले बुधबार पत्रकार सम्मेलनको आयोजना गरी सम्मेलनको तयारी अन्तिम चरणमा पुगेको बताएको छ । उपमहानगरपालिकाका प्रमुख खेलराज पाण्डेयले उपमहानगरपालिकाका समान मुद्धा र समान संरचनामा भइगरेका कामको आद्रान प्रदान गर्ने, साझा समस्याहरुको समधानमा एकिकृत पहल गर्ने, साझा र एकल अधिकार प्रयोगमा एकरुपता ल्याउने उद्देश्य सहित सम्मेलनको आयोजना गरिएको बताए ।
उपप्रमुख सावित्रादेवी अर्यालले सम्मेलनमा उपमहानगरपालिकाले गरेका असल सिकाईको समेत अनुभव आद्रान प्रदान गर्ने बताईन । सम्मेलनमा देशका ११ वटा उपमहानगरपालिका प्रमुख, उपप्रमुख र प्रमुख प्रशासकिय अधिकृतको सहभागिता हुनेछ । बुटवलको अन्तर्राष्ट्रिय सम्मेलन केन्द्रमा हुने उद्घाटन सत्रमा भने रुपन्देहीका सवै पालिकाका प्रमुख, उपप्रमुख, प्रमुख प्रशासकिय अधिकृत, सरकारी कर्मचारी सहित ५ सय जनाको सहभागिता हुने बुटवल उपमहानगरपालिकाका प्रमुख प्रशासकिय अधिकृत टेकराज पन्थीले जानाकारी दिए । आन्तारिक छलफल उपमहानगरपालिकाको सभा हलमा हुने र माघ २२ गते दिउंसो ३ बजे बुटवल घोषणापत्र जारी गर्दै सम्मेलनको समापन हुने उनको भनाई छ । सम्मेलनको सवै खर्च बुटवल उपमहानगरपालिकाले व्यहोर्ने छ ।