बुटवल । रुपन्देहीको कन्चन गाउपालिका वडा नं ५ गरगरेमा संचालित न्यू अर्घाखाँची सुनचाँदी पसलबाट सुनचाँदीका गरगहना राखिएको सेफ चोरी भएको छ ।

इलाका प्रहरी कार्यालय सालझण्डीका अनुसार शनिबार मध्यरातमा पसलको सटर फोरेर सेफ चोरी भएको हो । पसलधनी लालबहादुर बिश्वकर्माका अनुसार सेफमा ८ लाख बराबरको सुन र ६० हजार बराबरको चाँदीका गरगहना रहेका छन् ।

दुई सय पचास किलो भन्दा बढी वजन रहेको सेफ चोरी हुदा न त स्थानीयले थाहा पाए , न सीसीटिभी क्यामरमा कतै कैद भयो । कन्चन गाउपालिकाले बजार क्षेत्रमा सिसिटिभी राखेको भएपनि कुनै पनि चालु अवस्थामा नदेखिएको इप्रका सालझण्डीका प्रहरी निरिक्षक जगतनाथ मरासिनिले बताए ।

उनका अनुसार चोरी भएको ठाउँदेखि चार सय मिटर पश्चिम कपिलवस्तु जाने बाटोको कुलामा चाँदीको पाउजु र गहना राख्ने टेरे फेला परेको छ । प्रहरीले सर्च अभियान जारी राखेको जनाएको छ ।

यता सुनचादी ब्यबसायी संघ रुपन्देहीका महासचिब सिताराम रसाइलीले एक बिज्ञप्ती जारी गर्दै सुन पसलबाट सेफ नै चोरी हुनुले सिंगो सुनचाँदी ब्यबसायी आतंकित भएको उल्लेख गरेका छन । उनले घटनामा संलग्नहरुलाई तत्काल पक्राउ गरी चोरी भएको सुनचाँदी यथाशीघ्र बरामद गर्न माग गरेका छन् ।