गत पुस ९ गते सैनामैनामा मोटरसाइकलले पैदलयात्रीलाई ठक्कर दिएको घटनामा घाइतेलाई उद्धार गरेको बहानामा मोटरसाइकल चोरी गरी फरार भएका अभियुक्त पक्राउ परेका छन् ।
तौलिहवाका ईम्तियाज अहमद रंगरेजको मोटरसाइकल चोरी गरेको आरोपमा कञ्चन गाउँपालिका-२ गोफ्लापुर बस्ने २४ वर्षीया सागर बुढाथोकीलाई सालझण्डी प्रहरी रुपन्देहीले पक्राउ गरेको हो । बुढाथोकीबाट लु २० प ७०४४ नं को मोटरसाइकलसमेत बरामद गरिएको छ ।
बुढाथोकीले पुस १६ गते राति सैनामैना नगरपालिका -७ आमी बजारका टेकबहादुर छन्त्यालको पसलबाट सामसुङ मोबाइल, २ हजार २०० नगद र टेकबहादुर छन्त्यालकै नामको मतदाता परिचयपत्रको सक्कलप्रति पनि चोरी गरेको आरोप छ ।
जिल्ला प्रहरी कार्यालय रुपन्देहीका प्रहरी नायव उपरीक्षक श्यामु अर्यालले अभियुक्त बुढाथोकीलाई चोरीसम्बन्धी कसुरमा मुद्दा दर्ता गरी म्याद थपेर अनुसन्धान भइरहेको बताए ।
