नेकपा एमालेबाट लुम्बिनी प्रदेश र प्रतिनिधिसभामा निर्वाचित सांसदहरुले प्रदेश मुख्यमन्त्री नछोड्न केन्द्रीय नेतृत्वलाई दबाब दिएका छन् ।

एमाले लुम्बिनी प्रदेश कमिटीको आयोजनामा शुक्रबार बुटवलमा भएको संघ र प्रदेशमा निर्वाचित सांसदहरुको भेलाले लुम्बिनी प्रदेशमा संघ र प्रदेश दुवैमा एमाले पहिलो दल भएको भन्दै नयाँ राजनीतिक समीकरणअनुसार मुख्यमन्त्री एमालेकै हुनु पर्नेमा जोड दिएका हुन् । एमाले केन्द्रीय कमिटीका सचिव एवं प्रदेश इन्चार्ज छविलाल विश्वकर्माको उपस्थितिमा भएको भेलाले मुख्यमन्त्री नछोड्न दबाब दिएको हो । भेलामा प्रतिनिधिसभामा निर्वाचित २१ मध्ये १४ र प्रदेशसभामा निर्वाचित २९ जना सहभागी थिए ।

छलफलले लुम्बिनी प्रदेश संसदीय दलको नेताको टुंगो प्रदेशसभा सदस्यको शपथग्रहणपछि लगाउने भएको छ । लुम्बिनी प्रदेशसभामा एमालेबाट दलको नेताका लागि ५ जना आकांक्षी छन् । पोलिटब्युरो सदस्य एवं प्रदेश सहइन्चार्ज लीला गिरी, केन्द्रीय सदस्य भूमिश्वर ढकाल, चेतनारायण आचार्य, प्रदेश उपाध्यक्ष भोजप्रसाद श्रेष्ठ, सदस्य विष्णु पन्थीले संसदीय दलको नेता बन्न लबिङ गर्दै आएका छन् । प्रदेशसभाले पुस १७ गते आइतबार देउखुरीमा शपथग्रहण हुने जनाएको छ । त्यसपछि मात्र दलको नेता चयन प्रक्रिया सुरु हुने प्रदेशसभा सदस्य चेतनारायण आचार्यले बताए ।

कार्यक्रममा एमाले केन्द्रीय सचिव तथा लुम्बिनी प्रदेश इन्चार्ज विश्वकर्मासँगै, अनुशासनआयोगका उपाध्यक्ष नेत्रप्रसाद पन्थी, प्रदेश अध्यक्ष राधाकृष्ण कँडेल, उपाध्यक्ष भोजप्रसाद श्रेष्ठ, सचिव लक्ष्मण आचार्यलगायतका नेता पनि उपस्थित थिए । सांसदहरुलाई सम्मान गर्दै सचिव विश्वकर्माले एमालेविरुद्ध चौतर्फी घेराबन्दीबीच पनि लुम्बिनीका धेरै क्षेत्रमा पार्टीका उम्मेदवार विजयी भएर संघ र प्रदेश दुवैमा एमाले पहिलो पार्टी बनेकोमा नेतृत्वलाई धन्यवाद दिएका थिए । उनले केही क्षेत्रमा थोरै मतान्तरले पराजित हुन परेको पनि उल्लेख गरे ।

पार्टीका उम्मेदवारलाई विजयी गराउन खटिएको भन्दै जिल्ला अध्यक्षहरुलाई कार्यक्रममा सम्मान पनि गरिएको थियो । सम्मान कार्यक्रमपछि पार्टीले अबका दिनमा प्रदेशसभामा खेल्नुपर्ने भूमिका र नयाँ नेतृत्वको विषयमा छलफल भएको कपिलबस्तुबाट निर्वाचित प्रदेशसभा सदस्य विष्णु पन्थीले बताए ।