रूपन्देहीको सिद्धार्थनगर (भैरहवा) मा एक युवतीको रहस्यमय मृत्यु भएको छ ।
प्यूठान नगरपालिका–५ जुम्रिकाँढा पूर्णगाउँकी २२ वर्षीया लालमती खत्री क्षेत्री रूपन्देहीको सिद्धार्थनगर–१३ हाटबजारस्थित आफ्नै कोठामा १ हप्ता अगाडि झुण्डिएको अवस्थामा फेला परेकी थिइन् ।
२ वर्षदेखि भैरहवामा लक्ष्मी बुटिक टेलरिङ सेन्टर सञ्चालन गर्दै आएकी लालमतीको हत्या हो वा आत्महत्या यसबारे ठोस अनुसन्धान हुन सकेको छैन । झुण्डिएको अवस्थामा भेटिएकी युवतीका आफन्तले दिएको जाहेरी दरखास्त लिन प्रहरीले आनाकानी गरेको छ । परिवारले लालमतीको हत्या भएको भन्दै सिद्धार्थनगर नगरपालिका–१ रूपन्देहीका ३० वर्षीय जोर्डनविक्रम श्रेष्ठको नाममा किटानी जाहेरी दिएका छन् ।
बहिनीले आफ्नै कारणले आत्महत्या नगरेको भन्दै उनको कोठामा भेटिएका प्रमाणसहित कान्छो दाइ टेकराज केसी ८ दिनदेखि बहिनीको न्यायको खोजीमा भौतारिएका लोकान्तरलाई बताए । लालमती घरकी राइली छोरी हुन् । खत्रीको मृत्यको खबर प्रहरीले अकस्मात पुर्याउँदा परिवार पीडामा छन् । मृतकका दाइ टेकराजले भने, ‘हामीले पटक–पटक आग्रह गर्दा पनि किटानी जाहेरी दर्ता गर्न प्रहरीले मानिएको छैन ।’
पर्याप्त प्रमाण नभएको भन्दै जाहेरी लिन नमानेको प्रहरी बताउँछ । जिल्ला प्रहरी कार्यालय रुपन्देहीका प्रहरी निरीक्षक दीपक कुँवरले आत्महत्या दुरूत्साहनमा किटानी जाहेरी परे पनि आवश्यक कागजात नपुगेको उनले बताए । ‘आत्महत्या दुरूत्साहन हो भनेर संलग्न गरिएका कागजातले पुग्दैन,’ कुँवरले लोकान्तरसँग भने, ‘घटनाको अनुसन्धान भइरहेको छ ।’
लालमती बस्ने कोठामा आरोपित व्यक्तिको नेपाली नागरिकता र सेतो गन्जीको कपडा भेटिएको छ । बहिनीको न्यायको खोजीमा बुटवलमा मृतकका २ दाजुभाइ भौतारिएका छन् ।
आरोपित व्यक्तिको खोजी हुँदैछ, हुँदैछ भनेर मात्र प्रहरीले टार्न खोजेको परिवारको गुनासो छ । बहिनी र आरोपित व्यक्तिको बीचमा भिडियो च्याटको कुराकानी, बहिनी बस्ने कोठामा भेटिएको कपडा लगाएर बनाएको भिडियो र सार्थक बहुउद्देश्यीय सहकारी संस्था लिमिटेड भैरहवामा दुवै जनाले गरेको बचत पासबूक परिवारले प्रहरीलाई दिएका छन् ।
छिमेकीका अनुसार अघिल्लो साँझसम्म आरोपित व्यक्ति मृतकको कोठामा थिए । १ महिनादेखि विवाह गरेको भनेर सँगै बस्दै आएका छिमेकीसँग मृतक लालमतीले पनि भन्दै आएकी थिइन् । आरोपित युवा र मृतक युूवतीबीच गरिएका भिडियो, म्यासेजमा गरिएका कुराकानी, सँगै बसेका फोटा लगायत प्रमाणले उनीहरू प्रेम सम्बन्धमा रहेको बुझिएको छ । युवतीको शव अहिले बुटवलस्थित लुम्बिनी प्रादेशिक अस्पतालमा राखिएको छ ।
