फ्रान्सका फरवार्ड केलियान एम्बाप्पेले ब्राजिलका लिजेन्ड पेलेको दुर्लभ कीर्तिमान बराबरी गर्ने अवसर गुमाएका छन्।
फिफा विश्वकप २०२२ को फाइनल खेलमा ह्याट्रिक गर्दै विश्वकप इतिहासमै फाइनलमा ह्याट्रिक गर्ने दोस्रो खेलाडी बनेका उनले लगातार दुई सुरुवाती विश्वकपको उपाधि जित्ने कीर्तिमान भने भेट्टाउन सकेनन्।
२३ वर्षीय एमबाप्पेले फाइनल खेलमा जित दिलाउन सकेको अवस्थामा उनी २४ वर्षभन्दा कम समयमा नै आफ्नो मुलुकलाई दुईपटक विश्वकप जिताउने पेलेपछिको दोस्रो खेलाडी बन्ने थिए। उनी २४ वर्ष पूरा हुन २ दिन मात्र बाँकी छ।
पेलेले आफू २४ वर्षपुग्नुभन्दा पहिला नै ब्राजिललाई सन् १९५८ र १९६२ मा दुईपटक विश्वकपको उपाधि जिताएका थिए।
त्यसयता कुनै पनि टोलीले लगातार दुईपटक विश्वकपको उपाधि जित्न सकेको छैन।
