श्रीमानको घाँटी थिचेर हत्या गरेकाे आराेपमा जिल्लाकाे छत्रदेव गाउँपालिका–१, चिदिका तुमचौरकी लक्ष्मी नेपाली पक्राउ परेकी छन्।
उनले ७७ वर्षीय श्रीमान् बलबहादुर सार्कीको हत्या गरेकाे जिल्ला प्रहरी कार्यालयले जनाएकाे छ।
बलबहादुर र लक्ष्मीबीच मंसिर २४ गते साँझ घरायसी झगडा हुँदा बलबहादुरले श्रीमतीलाई कुटपिट गरेका थिए।
रिसको झोकमा लक्ष्मीले कम्मरमा बाँधेको पटुका निकालेर श्रीमानको घाँटी थिचेर हत्या गरेको जिल्ला प्रहरी कार्यालयका प्रमुख डिएसपी मुकुन्द रिजालले जानकारी दिए।
उनकाअनुसार लक्ष्मीले पासो लगाई घरको दोस्रो तलाको दलिनमा झुन्डाएर आफ्नो श्रीमानलाई मारेको बयान दिएकी छिन्।
सार्की दम्पतीले झगडा गर्नुअघि रक्सी सेवन गरेका थिए। श्रीमानको हत्या गरेपछि उनले आफूलाई ‘श्रीमानले कुटपिट गरेको’ भन्दै गाउँमा गुहार मागेकी थिइन्।
लक्ष्मीलाई पक्राउ गरेर अदालतबाट ७ दिनको म्याद थप गरी अनुसन्धान अगाडी बढाइएको डिएसपी रिजालले जानकारी दिएका छन्।
