बुटवल । नेकपा एमालेका उपाध्यक्ष विष्णु पौडेलले सरकार गठनको अदृष्य प्रयासमा एमाले नलागेको बताएका छन् । सिट संख्याको हिसाबमा बहुमत नभएको बताउँदै सरकार गठनको पहल कदमी लिन आवश्यक नभएको बताउँदै उपाध्यक्ष पौडेलले सशक्त र प्रभावकारी प्रतिपक्षको भूमिका निमाउने बताए ।
बुटवल कालिका क्याम्पसको ९ औं वाषिकोत्सवमा शुक्रबार संवोधन गर्दै नेता पौडेलले भने, ‘एमाले सरकार गठनको खेलमा लागेको छैन । सत्ता गठबन्धनसँग पनि बहुमत त छैन । तर, बहुमतको नजिक छ । त्यस कारणले हामी चाहन्छौं गठबन्धनले जोडजार गरेर बहुमत पु¥याई सरकार बनाओस । हामी प्रतिपक्षमा रहन्छौं ।’
माओवादी केन्द्रसँग सरकार गठनका लागि एमाले कुनै छलफल नगरेको समेत पौडेलले स्पष्ट पारे । ‘जनमतको हिसावले एमाले एक नम्बर पार्टी हो’ पूर्व अर्थमन्त्री समेत रहेका पौडेलले भने, ‘एमालेलाई रोक्नका लागि गरिएका प्रयास असफल भएको छ । एमालेको अग्रता र शिष्टतालाई कसैले चुनौती दिन सक्दैन । तर, प्राविधिक रुपमा केही सिटले हामी दोस्रो भएका हौं ।’
सत्ता गठबन्धनसँग एक्लै लडेर एमाले अहिले अवस्थामा आउनु ठूलो सफलता भएको पौडेलको भनाइ छ । निर्वाचनको एमालेले छिटटै समिक्षा गर्ने पनि पौडेलले बताए । रुपन्देही क्षेत्र नम्बर २ बाट निर्वाचित सांसद पौडेलले एमाले सरकारमा रहँदा वा प्रतिपक्ष रहे पनि रुपन्देहीको विकासलाई कनै अफ्टयारो नपर्ने पौडेलले बताए । सबैसँग एकताबद्ध भएर यस क्षेत्रको रुपन्देहीको विकासमा आफू सधै लाग्ने पौडेलले बताए ।
