मंसिर ४ मा सम्पन्न निर्वाचनमा प्रतिनिधिसभामा ७ वटा दलले मात्रै थ्रेसहोल्ड कटाउँदा लुम्बिनी प्रदेशमा भने १० राजनीतिक दलले थ्रेसहोल्ड कटाएका छन् । प्रतिनिधिसभाका २६ र प्रदेशसभाका कुल ५२ निर्वाचन क्षेत्र रहेको प्रदेशमा समानुपातिकमा थ्रेसहोल्ड कटाउने दलहरु प्रतिनिधिसभाभन्दा लुम्बिनी प्रदेशमा बढी देखिएका छन् । अब लुम्बिनी प्रदेशसभा १० राजनीतिक दलको प्रवेश हुने छ । प्रत्यक्षतर्फ भने प्रदेशमा ८ राजनीतिक दलले मात्रै निर्वाचन जितेका छन् ।
संविधानको व्यवस्था अनुसार प्रदेशमा ‘थ्रेसहोल्ड’ पार गर्न कुल सदर मतको १.५ प्रतिशत मत ल्याउनुपर्ने प्रावधान छ । निर्वाचन आयोगका अनुसार लुम्बिनी प्रदेशमा ३२ दलले निर्वाचनमा भाग लिएकामा १८ लाख ८७ हजार ७८ मत सदर भएको थियो । जसमा १० वटा दलले २८ हजार ३०६ मत (१.५ प्रतिशत) ल्याएर थ्रेसहोल्ड कटाएको आयोगले जनाएको छ ।
लुम्बिनीमा समानुपातिकबाट ३५ जना सांसद चुनिँदै छन् । १० दलले पाएको १७ लाख ७७ हजार ७२० मतलाई ३५ सिटमा भाग लगाउँदा सबैभन्दा धेरै (३० प्रतिशत) ५ लाख ७० हजार ९२१ मत पाउँदै नेकपा एमाले पहिलो दल बनेको छ । एमालेले लुम्बिनी प्रदेशसभामा ११ सिटसम्म पाउनेछ ।
प्रदेशमा दोस्रो स्थानमा रहेको नेपाली कांग्रेसले २६ प्रतिशत अर्थात् ९ लाख ९९ हजार ९८६ मत ल्याएको छ । काँग्रेसले ९ देखि १० सीटसम्म पाउनेछ । १ लाख ९८ हजार ४५० मत पाएको नेकपा माओवादी केन्द्रले ५ वटासम्म सिट पाउने बताइएको छ । उसले कुल मतको १० प्रतिशत पाएको छ । राष्ट्रिय प्रजातन्त्र पार्टीले ६ प्रतिशत अर्थात् १ लाख २७ हजार ४५२ मत ल्याएको छ । उक्त पार्टीले दुई सिट पाउनेछ ।
१ लाख २५ हजार ५२१ अर्थात् ६ प्रतिशत मत प्राप्त गरेको नागरिक उन्मुक्ति पार्टीले पनि दुई सीट पाउने आयोगले जनाएको छ । ४ प्रतिशत अर्थात् ८१ हजार ६०५ मत पाएको जनमत पार्टीले एक सीट पाउँदा ३ प्रतिशत अर्थात् ६० हजार ८८६ मत ल्याएको जनता समाजवादी पार्टीले पनि एक सिट पाउने जनाइएको छ ।
प्रदेशमा थ्रेसहोल्ड कटाएका नेकपा एकीकृत समाजवादी, लोकतान्त्रिक समाजवादी पार्टी र राष्ट्रिय जनमोर्चाले एक–एक सीट पाउनेछन् । लुम्बिनीका ५२ प्रत्यक्षतर्फका सिटमध्ये नेकपा एमालेले १८, नेपाली कांग्रेसले १७, नेकपा माओवादी केन्द्रले ५, राप्रपा, जसपा, नागरिक उन्मुक्ति र लोसपाले २–२ सिट जितेका छन् ।
८७ सदस्यीय प्रदेशसभामा माओवादीबाट बागी (स्वतन्त्र) उम्मेदवारी दिएर तीन जनाले निर्वाचन जितेका छन् भने जनमत पार्टीले एक सिट जित्दा एकीकृत समाजवादी र राष्ट्रिय जनमोर्चाले कुनै सिट जित्न सकेनन् छैनन् । प्रदेशमा कुनै दलको पनि बहुमत नआएकाले सरकार मिलिजुली बनाउनु पर्ने देखिन्छ । पाँच दलीय गठबन्धनको पनि बहुमत छैन । त्यसैले ठूला दलले सरकार बनाउन चाहे साना दलको भर पर्नुपर्ने देखिन्छ ।
