बुटवल । गुल्मीको मुसिकोट नगरपालिका ३ पेगामा कांग्रेस पार्टी परित्याग गरी सोमबार ५० बढि एमालेमा प्रवेश गरेका छन् ।
पेगामा भएको चुनावी अभियानको कार्यक्रममा नेपाली कांग्रेसका क्षेत्रीय कमिटिका सदस्य एवं मुसिकोट नगरपालिकाका कार्यसम्पादन कमिटीका सदस्य ज्ञान बहादुर जि.सि सहित ५० बढि एमालेमा प्रवेश गरेका हुन । उनीहरु सवैलाई पुर्वमन्त्री एवं गुल्मी–२ का प्रतिनिधी सभा सदस्यका उम्मेदवार गोकर्ण विष्टले स्वागत गरेका थिए । पार्टी प्रवेश गर्नेहरुले जनताको मर्म, आवश्यकता र विकासको काम एमाले पार्टीले मात्र गर्ने भएकाले एमाले रोजेको बताएका थिए ।
सोही अवसरमा नेता विष्टले जनताका आवश्यकता पुरा गर्ने जिम्मेवारी एमालेले लिने बताउँदै ४ मंसिरमा हुने निर्वाचनमा सुर्यमा मतदान गर्न सवैलाई आग्रह गरे । आफु मन्त्रिमण्डलमा रहँदा वा सांसद भएको अवस्थामा गुल्मेली जनताको सिर नझुक्ने गरी काम गरेको बताउँदै नेता विष्टले जनताको सेवक बनेर फेरी काम गर्ने प्रतिबद्धता मतदाता सामु गरे ।
उनले शिक्षा, स्वास्थ्य, सडक पुर्वधार, खानेपानी, विद्यालयका भवन निर्माण, सिचाई, कुलो, मठमन्दिर लगाएका पुर्वधारमा आफुले बजेट विनियोजित गरेर धेरै कार्य भएको भन्दै बांकी काम पनि निर्वाचित हुन साथ गर्ने बताए ।
