बुटवल उपमहानगरपालिका–१० बुटवल मण्डपमा बन्दै गरेको आधुनिक अन्तराष्ट्रिय प्रदर्शनी केन्द्रमा रुपन्देही उद्योग संघले पहिलो पटक प्रदर्शनी आयोजना गर्न लागेको छ ।

प्रदर्शनी आयोजना सफलता पूर्वक सम्पन्न गर्न आवश्यक तयारीका कामहरु द्रुत गतिमा अगाडी बढाउने लक्ष्यसहित मण्डपमा सचिवालय स्थापना गरिएको संघका महासचिव हरि बहादुर खत्रीले बताए । शुक्रवारबाट प्रदर्शनी तथा उद्योग संघको सबै काम सचिवालयबाट हुने महासचिव खत्रीले जानकारी दिए ।

काठमाडौं बाहिर निमार्ण गरिएको पहिलो अन्तराष्ट्रिय प्रदर्शनी केन्द्रमा पहिलो पटक आयोजना हुन लागेको औद्योगिक प्रदर्शनीमा उपभोक्ता दर्शकहरुले नयाँ स्वाद र व्यवस्थापन हेर्न पाउने संघका अध्यक्ष माधव प्रसाद पौडेलले बताए ।

अध्यक्ष पौडेलले आर्थिक गतिविधि खस्दो वर्तमान अवस्थामा प्रदर्शनी आयोजना चुनौतिपूर्ण रहेको बताउदै त्यसलाई आत्मसाथ गर्दै प्रदर्शनीको आयोजनाले उद्योगी, व्यवसायी एवं उपभोक्तामा उत्साहा जगाउने विश्वास व्यक्त गरे ।

“संमृद नेपाल निर्माणको आधार, स्वदेशी उद्यमशिलताको विस्तार” भन्ने मूल नाराका साथ हुन लागेको राष्ट्रिय औद्योगिक प्रदर्शनी, कृषि, प्रविधि तथा पर्यटन महोत्सव २०७९ मा स्वदेशी उत्पादन, प्रविधि र कृषि एवं पर्यटनको विकासका लागि समयको परिवर्तनस“गै परिमार्जित र परिस्कृत स्टलहरु समावेश गरिने संघले जनाएको छ ।

प्रदर्शनीमा सहभागिताका लागि स्टल दर्ताको काम सुरु भएको संघका प्रमुख कार्यकारी अधिकृत यादव प्रसाद भण्डारीले बताए ।

उनका अनुसार प्रदर्शनीमा विभिन्न प्रकृतिका करिव ५ सयसम्म विभिन्न प्रकृतिका स्टलहरुको सहभागिता रहने र शुक्रवारसम्म ५० वटा स्टल दर्ता भएका छन् ।

प्रदर्शनीका विशेषता रुपमा स्वदेशी उत्पादनको प्रदर्शन, प्रवद्र्धन तथा बजारीकरण, प्रविधि प्रदर्शन, पर्यटन प्रवद्र्धन एवं सूचना केन्द्र, विभिन्न लोक संस्कृति प्रदर्शन, दोहोरी गीत, लोकगीत र लोक नृत्य प्रतियोगीताहरु, प्रदर्शनी आइडल, औद्योगिक सूचना केन्द्रको संचालन, सूचना प्रविधि ग्रामको संचालन, कृषि ग्राम संचालन, अटो पेभेलियन, विभिन्न खेलकूद प्रतियोगिताहरु रहेको जनाइएको छ ।