छठ पुजाका लागि जाँदै गरेका पाँच जनालाई ठक्कर दिएर फरार रहेका कार चालकलाई रुपन्देही प्रहरीले पक्राउ गरेर सार्वजनिक गरेको छ । सोमबार बिहान करिब ५ बजे जिल्लाको ओमसतिया गाउँपालिका वडा नम्बर ४ मा कारको ठक्करबाट ३ जनाको मृत्यु भएको थियो भने दुईजना घाइते भएका थिए ।

आफूले चलाएको कारले ठक्कर दिएपछि फरार रहेका रुपन्देहीकै रोहिणी गाउँपालिका–३ धकधईका २३ वर्षीया अजयकुमार चौधरी र घटनामा प्रयोग भएको कारलाई प्रहरीले मंगलबार बिहान भैरहवाबाट पक्राउ गरेको हो । चौधरीविरुद्ध सवारी ज्यान मुद्दामा अनुसन्धान भइरहेको प्रहरीले जनाएको छ ।

रुपन्देही प्रहरी प्रमुख एसपी रवीन्द्र रेग्मीका अनुसार तीव्र गतिका कारण उक्त कारले स्थानीयलाई ठक्कर दिएको प्रारम्भिक अनुसन्धानमा देखिएको छ । ‘हाम्रो अनुसन्धानले अहिलेसम्म यही कुरा देखाएको छ, चालकले मदिरा सेवन गरेको पाइएन’, उनले भने, ‘बाँकी कुरा थप अनुसन्धान पछि खुल्ला ।’

चौधरीले चलाएको बा ८ च ६५३२ नम्बरको कारले ठक्कर दिँदा दुई महिनाका बालक श्रीराम कुर्मीसहित २८ वर्षीया प्रमिला कुर्मी र १४ वर्षीय सीमा कुर्मी गरी एकै परिवारका ३ जनाको मृत्यु भएको थियो । घटनामा परी २४ वर्षीया बन्दना कुर्मी र २६ वर्षीया मन्जु कुर्मी घाइते भएका छन् । उनीहरुको भैरहवास्थित मेडिकल कलेजमा उपचार भइरहेको छ ।

प्रहरीले दुर्घटनामा कारको अगाडिको बम्परको भागको टुक्रा, वाइपरको भाँचिएको टुक्रा र लुकिङ ग्लासको टुक्रा लगायत स्थानीयको सहयोग र सुक्ष्म अनुसन्धानबाट घटनामा संलग्नलाई चाँडै नै पक्राउ गर्न सफल भएको बताएको छ । उनीविरुद्ध अदालतबाट म्याद थप गरी अनुसन्धान अघि बढाइने प्रहरी भनाई छ ।