बुटवल । सिद्धार्थ ग्रुप अफ हस्पिटालिटिले भैरहवामा निर्माण गरेको पांचतारे होटल सिद्धार्थ भिलासा औपचारिक रुपमा संचालनमा आएको छ । यसअघि गत माघदेखि शुभारम्भ गरिएको होटलको विहिबारदेखि औपचारिक रुपमा संचालनमा ल्याईएको हो । सिद्धार्थ ग्रुपका अध्यक्ष चिन्तामणी न्यौपानेले विहिबारदेखि औपचारिक संचालन शुभारम्भ गरिएको भएपनि आगामी असोजमा विशेष शुभारम्भ गरिने बताए ।
विहिबार आयोजित पत्रकार सम्मेलनमा होटलबारे जानकारी दिंदै अध्यक्ष न्यौपानेले होटलमा डिलक्स, एक्ज्युकेटिभ स्विट, स्विट र प्रेसिडेन्सियल स्विट गरी चार स्तरका ८५ वटा कोठा रहेको बताए । त्यस्तै होटलमा पांचतारे होटलमा हुनुपर्ने सबै सेवासुविधा सहित विभिन्न क्षमताका सभा, सेमिनार र बैठक हलका साथै क्यासिनोको सुविधा रहेको बताए ।
करिब साढे २ अर्व लगानी रहेको होटल सिद्धार्थ भिलासामा ३ सय बढि कर्मचारी कार्यरत छन् । भैरहवामा संचालनमा आएको गौतमबुद्ध अन्तर्राष्ट्रिय विमानस्थल, गौतमबुद्ध जन्मस्थल लुम्बिनी र भारतीय सिमाक्षेत्रको नजिकै रहेकोले आन्तरिक तथा वाह्य पर्यटकहरुलाई लक्षित गरि होटल संचालनमा ल्याईएको अध्यक्ष न्यौपानेले बताए ।
