सुनजस्तै देखिने दुई किलो पहेँलो धातुसहित प्रहरीले एक जनालाई पक्राउ गरेको छ । सशस्त्र प्रहरी बल बीओपी बयरघाट रुपन्देहीले गएराति लुम्बिनी सांस्कृतिक नगरपालिका-१३ बाट कार र चालकसहित सुनजस्तो पहेँलो बस्तु बरामद गरेको हो ।
नेपालबाट भारततर्फ जाँदै गरेको बा १२ च ३८२० नं. को कारलाई जाँच गर्दा गियर बक्समा फल्स बटम बनाएर लुकाई छिपाई लैजाँदै गरेको अवस्थामा ईट्टा आकारको २ थान सुनजस्तो बस्तु बरामद गरिएको सशस्त्र प्रहरीका सहप्रवक्ता डीएसपी शैलेन्द्र थापाले जानकारी दिए ।
उनका अनुसार कार र चालक दाङको घोराही नगरपालिका- १० का हुमानन्द गिरीलाई पनि नियन्त्रणमा लिइएको छ । सुनजस्तो बस्तु भैरहवा भन्सार कार्यालयमा बुझाइएको उनले जानकारी दिए ।
