उनले कहिलेकाहीं विचौलियालाई पोसेर निम्न वर्गका नागरिकलाई प्रहरीले सहयोग नगरेको गुनासो आइरहेको जनाउँदै त्यसलाई रोक्नुपर्ने बताए । प्रहरीले आफ्नो मुख्य कर्तव्यलाई विर्सन नहुने भन्दै उनले कानूनको अधीनमा रहेर सेवा दिनुपर्नेमा जोड दिए ।
बुटवल उपमहानगरपालिकाका प्रमुख खेलराज पाण्डेयले बुटवल आधुनिक सहर बनेको उल्लेख गर्दै यहाँको सुरक्षा व्यवस्थाका लागि विशेष पहल गर्न अनुरोध गरे । निर्माणाधीन मोतिपुर औद्योगिक क्षेत्रमा अस्थायी प्रहरी पोष्ट स्थापनाका लागि उनले अनुरोध गरे ।
लुम्बिनी प्रदेश प्रहरी प्रमुख प्रहरी नायव महानिरीक्षक (डीआईजी) उमेशराज जोशीले प्रदेशको शान्ति, सुरक्षा अब्बल बनाउन लागि परेको बताए । यहाँ हुने कुनै पनि अपराधका घटनालाई सुक्ष्म अनुसन्धान गरी सफल तुल्याउन प्रहरी लागि परेको उनको भनाई छ । उनले प्रहरीले जनप्रतिनिधि, राजनीतिक दल, आमनागरिकसँग हातेमालो गरेर समाजमा सुरक्षा व्यवस्था मजबुत बनाउने बताए ।

रुपन्देहीका प्रमुख जिल्ला अधिकारी भरतमणि पाण्डेले यसअघि साँघुरो भवनबाट सेवा दिनु परेको उल्लेख गर्दै अहिले निर्माण भएको आधुनिक भवनका कारण प्रहरीको कार्यशैलीमा सुधार हुने बताए । रुपन्देही बसाइँसराइँको केन्द्र भएकाले आगामी दिनमा प्रहरी परिचालन पनि जनसंख्याको अनुपातमा गर्नुपर्नेमा उनले जोड दिए । अझै धेरै प्रहरीका भवन जीर्ण रहेको जनाउँदै त्यस्ता ठाउँमा नयाँ भवन निर्माण गर्न पहल गर्नुपर्ने उनको भनाई छ । रुपन्देहीका प्रहरी प्रमुख एसपी भरतबहादुर बिकले आफ्नै जग्गामा निर्मित नयाँ भवनबाट अब सेवा प्रवाहमा सहजता हुने बताए । उनले प्रहरी संगठनको नीति, नियम र कानूनको परिधीमा रहेर प्रहरीले काम गरिरहेको बताए ।

ईलाका प्रहरी कार्यालय, बुटवलका प्रमुख डीएसपी दानबहादुर थापाका अनुसार नवनिर्मित भवनमा कार्यालय, ब्यारेक, कार्यालय प्रमुख निवास, नागरिक सहायता कक्ष, मेस भवन र शौचालय छन् । यसअघि इलाका प्रहरी कार्यालय पुरानो र साँघुरो भवनमा रहेको थियो । भवनलाई अपांगमैत्री निर्माण गरिएको छ । महिलामैत्री ब्यारेक रहेको उहाँले बताउनुभयो । उद्घाटन कार्यक्रममा भवन निर्माण गर्ने ठेकेदार कम्पनी, उत्कृष्ट प्रहरी कर्मचारी लगायतलाई सम्मान गरिएको थियो । संघीय सरकार र प्रदेश सरकारको २ करोड ४१ लाख रुपैयाँ लागतमा कार्यालय भवन र ब्यारेकसहितका भवन निर्माण गरिएको हो ।