कार्यक्रममा बसपार्क क्षेत्रमा सञ्चालनमा रहेका सवारी साधनहरूमा ‘मादक पदार्थ सेवन गरेर सवारी चलाउँदिन’, ‘सवारी चलाउँदा मोबाइल फोन प्रयोग गर्दिन’, ‘बालश्रम प्रयोग गर्दिन’, ‘तीव्र गतिमा सवारी चलाउँदिन’ र ‘सभ्य भाषाको प्रयोग गर्छु’ लगायतका सन्देश समेटिएका स्टिकर टाँसिएको थियो।

कार्यक्रमका अध्यक्ष हुमबहादुर क्षेत्रीले स्थापना दिवसलाई केवल औपचारिक समारोहमा सीमित नराखी सामाजिक उत्तरदायित्वसँग जोड्न सडक सुरक्षा सचेतना कार्यक्रम आयोजना गरिएको बताए । पछिल्लो समय बढ्दै गइरहेका सडक दुर्घटनाप्रति सबै पक्षलाई सचेत गराउने, यातायात मजदुरहरूमा जिम्मेवारीबोध अभिवृद्धि गर्ने तथा सुरक्षित यात्राको संस्कार विकास गर्ने उद्देश्यले अभियान सञ्चालन गरिएको उनको भनाइ थियो ।

क्षेत्रीले यातायात मजदुरहरू श्रम मात्र गर्ने वर्ग नभई लाखौं यात्रुको जीवन सुरक्षासँग प्रत्यक्ष जोडिएको समूह भएकाले उनीहरूमा सकारात्मक व्यवहार, अनुशासन र जिम्मेवारीको भावना विकास गर्नु आवश्यक रहेको बताए । यस्ता अभियानले मजदुरको पेशागत प्रतिष्ठा बढाउनुका साथै सुरक्षित सडक संस्कृतिको निर्माणमा योगदान पुग्ने विश्वास उनले व्यक्त गरे ।

कार्यक्रममा जिफन्ट राष्ट्रिय कमिटी सदस्य तथा लुम्बिनी प्रदेश अध्यक्ष हुमाकान्त काफ्ले, ट्राफिक कार्यालयका प्रहरी सहायक निरीक्षक मधुसुदन बञ्जाडे, बुटवल ट्याक्सी सेवा प्रालिका अध्यक्ष विजय कुँवर, यातायात मजदुर तथा भलाइ कोषका कोषाध्यक्ष प्रकाश कुमार नेपाल, लुम्बिनी ट्रक समितिका अध्यक्ष रुमाखर गौतम, पश्चिम नेपाल बस व्यवसायी प्रालिका प्रबन्धक रामचन्द्र बस्याल तथा नेपाल यातायात स्वतन्त्र मजदुर संगठनका केन्द्रीय उपाध्यक्ष एवं लुम्बिनी प्रदेश इन्चार्ज ठाकुर प्रसाद गैरे लगायतले शुभकामना मन्तव्य व्यक्त गरेका थिए ।

कार्यक्रमको सञ्चालन संगठनका सह–सचिव केशवराज पौडेल ले गरेका थिए । संगठनले स्थापना दिवसको अवसरमा असार ८ गते विहान रक्तदान र ९ गते शुभकामना आद्रान प्रदान गर्ने बताएको छ ।