प्यूठानको माण्डवी गाउँपालिका–३ देवीस्थानस्थित सल्लाको खोटो संकलन गरेर राखिएको गोदाममा भीषण आगलागी भएको छ।
दिउँसो साढे २ बजेबाट सुरु भएको आगलागी अहिलेसम्म नियन्त्रणमा आउन नसकेको स्थानीय पत्रकार लवदेव अधिकारीले जानकारी दिए। उनका अनुसार अहिले देवीस्थान बजारनजिकको जंगलमा आगो फैलिएको छ।
बजार र बस्ती आगलागीको जोखिममा परेको र आगो नियन्त्रणका लागी सबैखाले प्रयास भइरहेको छ। ‘खोटोको गोदाममा आगलागी भयो। त्यो आगो अहिलेसम्म निभेको छैन,’ अधिकारीले भने,‘खोटोबाट सुरु भएको आगो वनमा पनि फैलिएको छ।’
आगो नियन्त्रणको प्रयास भइरहेको छ। प्यूठान नगरपालिकाको दमकल, नेपाल प्रहरी, सशस्त्र प्रहरी र नेपाली सेनाको टोली परिचालन भएको छ। झण्डै ८० लाख बराबरको खोटो जलेर नष्ट भएको जनाइएको छ।
स्थानीयका अनुसार आगो देवीस्थान बजारको माथिल्लो जंगलमा लागिरहेको छ। स्थानीयहरुले घरबाहिर निस्केर आगो निभाउने प्रयास गरिरहेको स्थानीय बासिन्दा दीपा घिमिरेले बताइन्।
‘आगो बस्तीमा आउने जोखिम छ। हामी सबै आगो निभाउन खटिएका छौँ,’ घिमिरेले भनिन्,‘सबैको प्रयास जारी छ।’
