बुटवल । उपभोक्ता हित संरक्षण मञ्च, बुटवलले शुक्रबार विश्व उपभोक्ता दिवसको अवसर पारेर खाद्य शुद्धता सम्बन्धी अभिमुखीकरण तथा उपभोक्ता सचेतना अन्तरक्रिया कार्यक्रम गरेको छ ।
उपभोक्तालाई अधिकारको विषयमा जागरुक बनाउने उद्देश्यले सचेतना कार्यक्रम गरिएको हो । विश्व उपभोक्ता दिवस दिवस हरेक वर्ष मार्च १५ तारिकमा मनाउने गरिन्छ । सो अवसरमा बोल्दै बुटवल उपमहानगरपालिकाका उपप्रमख सावित्रादेवी अर्यालले उपभोक्ता अधिकार ठगिबाट जोगिन आफै पहिला सचेत बन्नुपर्ने बताइन् ।
सधै मारमा परेका उपभोक्तालाई अधिकारको लागि राज्य पनि जिम्मेवार हुनुपर्नेमा उनको जोड थियो । कार्यक्रममा उपभोक्ता हित संरक्षण मञ्च बुटवलका अध्यक्ष समुन्द्र जिसीले उपभोक्ता अधिकार दायित्व सबैको भएको बताए ।
कार्यक्रममा बुटवल उपमहानगरपालिकाका अधिकृत ठगिश्वर पोखरेलले अधिकारका लागि उपभोक्ता आफैं जागरुक हुनुपर्ने बताए । कार्यक्रममा १०० भन्दा बढी उपभोक्ताहरु सहभागी थिए । उनीहरुले अधिकार र प्राप्तीका विषयमा मञ्चको काम र भूमिकाबारे विभिन्न प्रश्नहरु राखेका थिए । विश्वमै पहिलो पटक सन् १९६२ मार्च १५ मा अमेरिकी संसदमा राष्ट्रपति जोन अफ केनेडीले प्रस्तुत गरेका सुरक्षा, सूचना, छनोट र सुनुवाइलाई उपभोक्ताका चार अधिकारका रुपमा घोषणा गरिएको थियो ।
यिनै अधिकारका आधारमा संयुक्त राष्ट्रसंघको महासभाबाट सन् १९८५ मा उपभोक्ताका आठ वटा अधिकारसहित उपभोक्ता अधिकार सम्बन्धी संयुक्त राष्ट्रसंघीय मार्गदर्शन पारित भएको थियो ।
