बुटवल । बुटवल उपमहानगरपालिकाले आफ्नो ६५ औं स्थापना दिवसको अवसर पारेर भोलीदेखि दुई दिने प्रथम अन्तर विद्यालय लोकनृत्य प्रतियोगिता गर्ने भएको छ । संस्कृति संरक्षण गर्दै सामाजिक एकता, मनोरञ्जन र उत्सवको रूपमा प्रतियोगिता गर्न लागेको हो । प्रतियोगितामा बुटवल भित्रका ४४ सामुदायिक र संस्थागत विद्यालयहरुको सहभागिता रहने सोमबार आयोजित पत्रकार सम्मेलनमा नगर प्रमुख खेलराज पाण्डेयले जानकारी दिए ।
प्रतियोगिता बुटवल उपमहानगरपालिकाको परिसरमै हुनेछ । प्रतियोगितामा प्रथम हुने विद्यालयले १ लाख, द्धितीय हुनेले ६० हजार, तृतीय हुनेले ३० हजार नगद र प्रमाणपत्र पाउनेछन । ‘लोकनृत्य समाजको सांस्कृतिक समृद्धि जीवित प्रमाण हो’ मेयर पाण्डेयले भने, ‘जसले संस्कृतिको संरक्षण, सामाजिक एकता, पहिचानको अभिव्यक्ति, मनोरञ्जन र उत्सवको भूमिका खेल्दछन ।’ लोकनृत्य प्रतियोगितामा ५ हजार बढी अवलोकन गर्ने कार्यक्रम संयोजक नारायण पुनले जानकारी दिए ।