कोषाध्यक्ष विष्णुकुमारी जिसीले पेश गरेको एक वर्षको प्रतिवेदनमा ३४ लाख ४१ हजार १ सय ६१ रकममध्ये २७ लाख २० हजार २ सय ६० खर्च भएको र ७ लाख २० हजार ९ सय एक रकम मौज्जात रहेको उल्लेख छ । जसमध्ये आम्दानीमा चालु आर्थिक वर्षमा २३ लाख ४ हजार ९ सय ९७ र अघिल्लो वर्षको बैंक मौज्जातबाट ११ लाख ३६ हजार १ सय ६३ रकम मिलान गरिएको छ ।

समितिका अनुसार यो वर्ष ट्यांकी निर्माण तथा ठूला पाइप बिस्तारमा धेरै खर्च भएका कारण ठूलो बजेट खर्च भएको सचिव अर्जुन जीसीलेले बताए । शनिबार आयोजित सार्वजनिक सुनुवाई कार्यक्रममा बुटवल वडा नं ११ का सदस्य नकुल शाहीले हरेक संस्थामा पारदर्शी आम्दानी खर्च विवरणले संस्थालाई जनउत्तरदायी बनाउने र सदस्यहरुसँग विश्वास बढाउने बताए ।

उनले संस्थाले बिगतका वर्षहरुबाट नै यस्तो राम्रो कामको शुरुवात गरेकोले काम गर्न धेरै सहज भएको र अन्य संघसंस्थाहरुले यस्तो विषयको अनुशरण गर्नुपर्ने उनको भनाइ छ ।

शाहीले गाउँटोलको विकासका लागि दलीय कुण्ठाबाट माथि उठ्नुपर्ने र विकासका हातेमालो नभए काम गर्न समस्या हुने विषयमा सबै दलका कार्यकर्ताहरु सचेत हुनुपर्ने जनाए ।

संस्थाका सल्लाहकार बलराम न्यौपानेले संस्थागत पारदर्शीका लागि सबै संस्थाहरुले आफ्नो योजनामा सार्वजनिक सुनुवाई कार्यक्रमलाई राख्नुपर्ने बताए । कार्यक्रममा टोल विकास संस्थाका रमा पराजुली, स्थानीय सूर्य कुँवर, भेषराज पोखरेललगायतले बोलेका थिए । करिब १६ सय घरभुरी उपभोक्ता रहेको यो समितिले हरेक वर्ष सार्वजनिक सुनुवाई गर्दै आएको छ ।