उक्त सम्झौता पत्रमा देवदह नगरपालिको तर्फबाट नगरप्रमुख धु्रवप्रसाद खरेल, उपप्रमुख विद्यालक्ष्मी गुरुङ, प्रमुख प्रशासकीय अधिकृत कृष्णप्रसाद सापकोटा र नेपाल रेडक्रस सोसाईटीको तर्फबाट रुपन्देही शाखा सभापति दिपकप्रसाद क्षेत्री न्यौपाने, उपसभापति मित्रलाल न्यौपाने र रक्तसञ्चार सेवा केन्द्र बुटवलका ईन्चार्ज राधा ज्ञवालीले हस्ताक्षर गरेका छन् ।

सम्झौता पत्रमा देवदह नगरवासीलाई निशुल्क रगत उपलव्ध गराउने, सेवा वापतको रकम देवदह नगरपालिकाले व्यहोर्ने, प्रत्येक महिना विल सहित नगरपालिकामा बुझाउने, निशुल्क रगत लिनको लागि देवदहवासी हुनु पर्ने, रगत लिदा स्थायीवासीको प्रमाण पेश गर्नुपर्ने, आपत कालिन अवस्थामा देवदह नगरपालिकाले गरेको सिफारिसको आधारमा रगत उपलव्ध गराउने उल्लेख गरिएको छ । नागरिकता, बसाईसराई, विवाह दर्ता, तथा नगरपालिकाको सिफारिसको आधारमा रगत उपलव्ध गराउने सम्झौता पत्रमा उल्लेख गरिएको छ ।

यसैगरी नगरपालिका भित्र रक्तदानको कार्यत्रम गर्न नगरपालिकाले समन्य गर्नुपर्ने, एक आर्थिक बर्षमा एक जनालाई बढिमाा १५ पिन्ट सम्म रगत उपलव्ध गराउने निर्णय सम्झौतामा उल्लेख गरिएको छ । सो अवसरमा बोल्दै नगर प्रमुख खरेलले रगतको अभावमा कुनैपनि नगरवासीले मृत्युवरण गर्न नपरोस भनेर नगरपालिका र रक्तसञ्चार सेवा केन्द्र वीच सम्झौता गरिएको बताए ।

उनले विगतका दिनमा पनि नगरपालिकाले नागरिकलाई निशुल्क रगत उपलव्ध गराउदै आएपनि अहिले त्यसलाई व्यवस्थित गर्ने गरी सम्झौता गरिएको बताए । उनले रक्तसञ्चार सेवा केन्द्रमा रगत लिन पुगेका देवदहवासीलाई नगरपालिकाले दिने सेवाको वारेमा जानकारी दिन समेत आग्रह गरे ।

सोही अवसरमा बोल्दै नेपाल रेडक्रस सोसाईटी रुपन्देही शाखाका सभापति न्यौपानेले रगतको कुनै मुल्य नहुने बताउदै रगत व्यवस्थापनमा लाग्ने खर्चमात्र लिईएको जानकारी दिए । उनले रुपन्देहीको १६ वटै पालिका संग सम्झौता गरिरहेको बताउदै नागरिकलाई रगत लिन सहज होस भनेर यस्ता अभियान संचालन गरेको बताए ।