बुटवल । कृषकले अहिले खेतमा धान लगाएका छन् । कतिपयले अझै रोपाई गरिरहेका छन् । रोप्नु अघि र रोपेपछि धानमा मल चाहिन्छ । नेपालमा मल किसानले सहजै पाउँदैनन् । पाएको मलमा पनि ठुलाबढाको रजगज चल्छ ।
सरकारले सहकारी मार्फत अनुदानमा पनि मल वितरण गर्छ । यस्तो अनुदानमा वितरण गरिने मलमा ठुला भनिनेहरुले ‘¥याल’ काढ्छन् ।
यस्तै भएको छ, लुम्बिनी प्रदेशको कपिलबस्तु जिल्ला स्थित शुद्धोधन गाउँपालिकामा ।
शद्धोधन गाउँपालिका–३ लवनीस्थित कृषि सहकारीका लागि कृषि सामग्री केन्द्र तौलिहवाबाट ल्याएको मल सहकारीका अध्यक्षले कालोबजारीमा बेच्न सुसुराली पुराएका छन् ।
ओम कृषि सामग्री केन्द्रका अध्यक्ष भागीरथी यादवले कृषकका लागि अनुदानमा ल्याएको ५४ बोरा मल उनले शुद्धोधन गाउँपालिका–६ स्थित ससुरा बनारसी यादवको घरमा लगेर लुकाएर राखेको तथ्य बाहिर आएको छ ।
ससुरालीमा लुकाएर राखेको मल प्रहरीले अहिले जफत गरेको छ ।
जिल्ला प्रहरी कार्यालय कपिलबस्तुका प्रहरी निरीक्षक शैलेश्वरी बोहोराले मल लुकाएको सूचना पछि बनारसी यादवको घरबाट मल जफत गरेको बताईन । उनका अनुसार यस बारे थप अनुसन्धान भइरहेको छ ।
बोहोराले कालोबजारीमा बेच्ने नियतले नै मल ससुराली पुराएको हुन सक्ने भन्दै अनुसन्धान गरिरहेको बताईन ।
तर यता अध्यक्ष भागीरथी यादवले भने सहकारीको गोदाममा पानी चुहिने भएकाले ससुरालीमा राख्न लगिएको दाबीगरे ।
