बुटवल । राष्ट्रिय स्वतन्त्र पार्टी (रास्वपा) का लुम्बिनी प्रदेश सभापति देवराज पाठकले राजतन्त्रको विषयमा सामाजिक सञ्जालमा लेखेको विषय अहिले चर्चामा छ ।
वैशाख ५ गते बिहान उनले लेखेको फेसबुक स्टाटसलाई विभिन्न मिडियाले समाचारमा स्थान दिए । उनी राजतन्त्रको पक्षमा उभिएको भन्दै समाचार प्रकाशन भएपछि पाठकले अर्को स्टाटस लेखेका छन् ।
२०८२ वैशाख ५ गते पोस्ट गरेको स्टाटसका सम्बन्धमा विभिन्न सञ्चारमाध्यममा आएको समाचारप्रति ध्यानाकर्षण भएको भन्दै उनले आइतबार फेरि अर्को स्टाटस लेखेका हुन् ।
राष्ट्रिय स्वतन्त्र पार्टीको जलेश्वर बैठकले बहुदलवादमा आधारित सङ्घीय गणतान्त्रिक शासन व्यवस्थाको राजनीतिक प्रतिवेदन स्वीकृत गरेको स्मरण गराउँदै उनले रास्वपा संवैधानिक समाजवादमा विश्वास राख्ने प्रस्ट पारेका छन् ।
‘संविधान परिवर्तनशील दस्तावेज हो । देश र जनताको सर्वोत्तम हितका लागि संविधानमा समयानुकूल परिमार्जन गर्दै संविधानको अक्षरसः पालना नै संवैधानिक समाजवाद हो,’ उनले लेखेका छन्, ‘पार्टीको विधानको अनुसरण र पार्टीको नीति स्थापित गराउने जिम्मेवारी लिएको म एक जिम्मेवार कार्यकर्ताको हैसियतले पार्टीले लिएको नीति र विधिविरुद्ध फरक कित्तामा उभिने कुरै हुँदैन ।’
