बुटवल । रूपन्देहीको तिलोत्तमा नगरपालिका–५ स्थित मणिग्राम चोकमा जडान गरिएका ट्राफिक लाइट बल्न छाडेका छन् । नगरपालिकाले २० लाख रुपैयंँ बजेट छुट्टायर जडान गरेको ट्राफिक लाइट पछिल्लो एक महिना यता बल्न छाडेका हुन् ।
ट्राफिक लाइट बल्न छाडे पनि मर्मतका लागि पहल नगरिएको स्थानीयले गुनासो गरेका छन । तिलोत्तमाका अन्य क्षेत्रहरुको तुलनामा मणिग्राम चोकमा बढि नै सवारी चाप हुने गरेको छ । सोही कुरालाई ध्यानमा राखेर तत्कालिन मेयर बासुदेव घिमिरेको कार्यकालमा २०७८ सालको जेठ महिनामा तिलोत्तमा नगरपालिकाले मणिग्राम चोकमा ट्राफिक लाइट जडान गरिएकोे थियो ।
जडान यता केही समय ट्राफिक लाइट राम्रै चलेपनि पछिल्लो समय भने पटक–पटक बिग्रिदै र मर्मत हुंदै आएको थियो । तर पछिल्लो एक महिना यता भने ट्राफिक लाइट पुर्ण रुपमा बन्द छ ।
बडो तामझामका साथ जडान गरिएको ट्राफिक लाइट महिना दिन बढि बिग्रेर बस्दा समेत मर्मतका लागी कुनै पहल नगरिनु दुखद र लार्पवाही भएको स्थानियको भनाई छ । नगरपालिकाले भने विग्रेको लाईट अब तुरुन्तै मर्मत गर्ने बताएको छ ।