मन्त्री भएको डेढ महिना पुग्न लाग्दासमेत पदवहाली गरेकी छैनन् । उनीसँगै जिम्मेवारी तोकिएका सबै मन्त्रीले पदवहाली गरे पनि उनले पार्टीको निर्णयप्रति असन्तुष्टि जनाउँदै पदवहाली अस्वीकार गर्दै आएकी छन् ।

तर उनले सामाजिक सञ्जालमा विभिन्न पर्वमा मन्त्रीकै हैसियतमा शुभकामना दिइरहेकी छन् भने सरकारी गाडी नै प्रयोग गरिरहेकी छन् । आइतबार नेपालगन्ज रंगशालामा २८ औं माओवादी जनयुद्ध दिवसको अवसरमा भएको फुटबल प्रतियोगिताको उदघाटनमा उनी मन्त्रीकै हैसियतमा सहभागी भएकी थिइन् । त्यस्तै तीनदिन अघिमात्रै केसीले मन्त्रीकै हैसियतमा नेपालगन्जमा प्रदेशस्तरीय प्रदर्शनीको उदघाटन गरेकी थिइन् ।

सत्ता गठबन्धनमा भएको भागवण्डाअनुसार माओवादीलाई परेको भौतिक पूर्वाधार विकास मन्त्रालयमा उनको दाबी थियो । तर, पार्टीले उनलाई आन्तरिक मामिला मन्त्रालयलको जिम्मेवारी दिएपछि उनले अस्वीकार गर्दै मन्त्रीबाट राजीनामा दिएकी थिइन् । उनको राजीनामा स्वीकृत पनि भएको छैन् । मन्त्री केसीले जिम्मेवारी बाँडफाँडमा पार्टीभित्र व्यक्तिको एकल निर्णय भएको भन्दै पार्टीमा छलफल गरेर मात्र पदवहाली गर्ने–नगर्ने निर्णय लिने बताएकी थिइन् ।

पदबहाली अस्वीकार गरेपनि मन्त्रीकै हैसियतमा हिंडेको विषयमा राखेको जिज्ञासामा आफू राजीनामा स्वीकृत नभएसम्म मन्त्रीकै हैसियतमा रहेको बताइन् । पदभार ग्रहण नगरी किन मन्त्रीको हैसियतमा हिंड्नुभएको भन्ने जिज्ञासामा केसीले भनिन्–“यस्तो प्रश्न सोध्ने तपाईं को ? म राजीनामा स्वीकृत नभएसम्म मन्त्रीकै हैसियतमा छु, पदभार ग्रहण गर्ने नगर्ने मेरो कुरा हो, मन्त्रीबाट हटेका मान्छे पनि एक डेढ महिनासम्म मन्त्रीकै हैसियतमा हिंडेका छन्, तिनको बारेमा खोज्नुस् न ।”

उनले आफूलाई यस्ता प्रश्न नगर्न आग्रह गरिन् । “म जुन हैसियतमा हिंडेपनि तपाईंलाई के मतलव”–उनले भनिन् ।

माओवादी स्रोतकाअनुसार उनले संसदीय दलको बैठकपछि पनि जिम्मेवारी स्वीकार नगरे कारबाही गर्नुपर्ने माग पार्टीभित्रै जोडदारले उठिरहेको छ । मन्त्री केसी माओवादीमा जर्नादन शर्मा निकट मानिन्छिन् ।