बुटवल। टीभिएस मोटर कम्पनीले आफ्नो नयाँ मोटरसाइकल टीभिएस अपाचे आरटीआर १६० फोर भी (TVS Apache RTR 160 4V) बुटवलमा सार्वजनिक गरेको छ। जगदम्बा मोटर्समार्फत आयोजित कार्यक्रममा सार्वजनिक गरिएको यो मोटरसाइकललाई कम्पनीले १६० सीसी वर्गकै सबैभन्दा शक्तिशाली मोडलका रूपमा प्रस्तुत गरेको हो।
कम्पनीका अनुसार नयाँ अपाचे आरटीआर १६० फोर भीमा पहिलोपटक प्रोजेक्टर हेडलाइट, अपसाइड–डाउन (USD) अगाडिको सस्पेन्सन तथा ५ इन्चको टीएफटी डिजिटल इन्स्ट्रुमेन्ट क्लस्टर जस्ता अत्याधुनिक प्रविधि समावेश गरिएको छ। रेसिङ इन्जिनियरिङमा आधारित यस मोटरसाइकलमा स्पोर्ट, अर्बन र रेन गरी तीनवटा राइडिङ मोड उपलब्ध छन्।
१५९.७ सीसी क्षमताको इन्जिन रहेको यस मोटरसाइकलले स्पोर्ट मोडमा १७.५५ पीएस तथा अर्बन र रेन मोडमा १५.६४ पीएस शक्ति उत्पादन गर्ने कम्पनीले जनाएको छ। साथै, यसमा डुअल–च्यानल एन्टिलक ब्रेकिङ सिस्टम (एबीएस) र १२ लिटर क्षमताको इन्धन ट्याङ्की रहेको छ।
सार्वजनिक कार्यक्रममा बुटवलका लागि जगदम्बा मोटर्सका आधिकारिक विक्रेता बालाजी अटोमोबाइल्सका सञ्चालक विशाल जैसवालले टीभिएस अपाचे नेपाली युवामाझ उत्कृष्ट प्रदर्शन, आकर्षक डिजाइन र आधुनिक प्रविधिका कारण लोकप्रिय रहेको बताए। उनले नयाँ मोडलले ग्राहकको विश्वासलाई अझ मजबुत बनाउने विश्वास व्यक्त गरे।
त्यसैगरी, जगदम्बा मोटर्सका प्रिमियम बिक्री प्रमुख विपिन बोगटीले अपाचे ब्रान्डले २५ वर्षभन्दा बढी समयदेखि विश्वका ६० भन्दा बढी देशका ७० लाखभन्दा बढी ग्राहकको विश्वास जित्न सफल भएको उल्लेख गर्दै नयाँ अपाचे आरटीआर १६० फोर भीले १६० सीसी वर्गमा नयाँ मापदण्ड स्थापित गर्ने दाबी गरे।
कम्पनीका अनुसार टीभिएस अपाचे आरटीआर १६० फोर भी टीएफटी नेपालभरका चयनित विक्रेतामार्फत उपलब्ध भइसकेको छ भने छिट्टै देशभर विस्तार गरिनेछ। यो मोटरसाइकल म्याट कालो, रेसिङ रातो र मरिन नीलो गरी तीन आकर्षक रङमा उपलब्ध रहेको कम्पनीले जनाएको छ।
यस मोटरसाइकलको शोरुम मूल्य ४ लाख २९ हजार ९ सय रुपैयाँ निर्धारण गरिएको छ।
