नेपाली काँग्रेस लुम्बिनी प्रदेश निर्वाचन परिचालन समितिका संयोजक तथा प्रदेश उपसभापति राजु खनालले जनताको अपेक्षा पूरा गर्न काँग्रेसले पुनः जिम्मेवारीसाथ अघि बढ्ने दाबी गरे । उनले पार्टीले ऐतिहासिक रूपमा लोकतान्त्रिक आन्दोलनको नेतृत्व गर्दै आएको स्मरण गर्दै संविधान, संघीयता, गणतन्त्र र समावेशी व्यवस्थाको संरक्षण काँग्रेसकै प्राथमिकता रहेको बताए ।

खनालले देशभित्र र बाहिर रहेका सम्पूर्ण लोकतन्त्रप्रेमी नागरिक, नागरिक समाज, युवा, बुद्धिजीवी तथा पार्टीका सम्पूर्ण पंक्तिलाई आगामी निर्वाचनमा काँग्रेसका उम्मेदवारलाई विजयी गराउन एकताबद्ध हुन आह्वान गरे ।

पार्टीले विगत केही वर्षमा देखिएका राजनीतिक अस्थिरता, आर्थिक चुनौती र सुशासनप्रतिको जनअसन्तुष्टिको समाधान काँग्रेसको नेतृत्वबाट मात्रै सम्भव हुने दाबी गरेको छ । संगठन विस्तार, जनसम्पर्क सुदृढीकरण र तल्लो तहसम्म अभियानलाई तीव्र बनाइएको खनालले बताए ।

उनले बदलिँदो राजनीतिक परिस्थितिमा काँग्रेसको भूमिका अझ जिम्मेवार र संवेदनशील हुनुपर्ने उल्लेख गर्दै अनुशासित, मर्यादित र जनमुखी निर्वाचन अभियान सञ्चालन गर्न पार्टी पंक्तिलाई निर्देशन दिए । उनले आगामी निर्वाचनलाई लोकतन्त्रको रक्षा, स्थायित्व र समृद्धिको लक्ष्य पूरा गर्ने अवसरका रूपमा उपयोग गर्नुपर्नेमा जोड दिए ।