बुटवल । बुटवल उपमहानगरपालिकाले सञ्चालन गरेको ‘बा-आमासँग नगरप्रमुख’ कार्यक्रमबाट दुई हजारभन्दा बढी ज्येष्ठ नागरिक लाभान्वित भएका छन् । पुस ७ गतेदेखि २१ गतेसम्म वडा-वडामा सञ्चालन गरिएको निःशुल्क स्वास्थ्य परीक्षण शिविरमार्फत २ हजार १०० भन्दा बढी ज्येष्ठ नागरिकले प्रत्यक्ष सेवा लिएका हुन् ।
ज्येष्ठ नागरिक, वृद्धवृद्धा तथा अपाङ्गता भएका व्यक्तिहरूको जीवनयापनलाई सहज बनाउने उद्देश्यले उपमहानगरपालिकाले आवश्यक कानुनी व्यवस्था गर्दै यो कार्यक्रम सञ्चालन गरेको हो । ‘बा-आमासँग नगरप्रमुख’ बुटवल उपमहानगरपालिकाको नविनतम र प्रभावकारी सामाजिक उत्तरदायित्वमूलक कार्यक्रमका रूपमा स्थापित हुँदै गएको छ ।
उपमहानगरपालिकाले वर्षमा दुई पटक वडा-वडामा स्वास्थ्य शिविर सञ्चालन गरी ६० वर्षमाथिका नागरिकको स्वास्थ्य परीक्षण गर्दै आएको छ । बुटवल उपमहानगरपालिकाका स्वास्थ्य शाखा उप-निर्देशक युवराज पाण्डेका अनुसार विशेषज्ञ चिकित्सकसहितको टोलीद्वारा शिविर सञ्चालन गरी रक्तचाप, मधुमेह, हृदय, आँखा लगायतका स्वास्थ्य समस्या परीक्षण गरिएको थियो । परीक्षणपछि आवश्यक औषधि समेत निःशुल्क वितरण गरिएको उनले जानकारी दिए ।
पाण्डेका अनुसार स्वास्थ्य परीक्षणका क्रममा धेरैजसो ज्येष्ठ नागरिकमा उच्च रक्तचाप र मधुमेहको समस्या देखिएको छ । थप उपचार आवश्यक पर्ने बिरामीलाई अस्पताल पठाउनुपर्ने अवस्थामा सम्बन्धित अस्पतालसँग समन्वय गरी सस्तो तथा निःशुल्क उपचारको व्यवस्था मिलाउन उपमहानगरपालिकाले पहल गरेको छ ।
“घरमै बसेर विशेषज्ञ चिकित्सकसँग आफ्ना स्वास्थ्य समस्या राख्न पाउँदा सेवाग्राही ज्येष्ठ नागरिक अत्यन्तै खुसी देखिएका छन्,” पाण्डेले भने, “यस कार्यक्रमले स्थानीय सरकार जनताको अभिभावकका रूपमा रहेको अनुभूति गराएको छ ।”
स्थानीय तहबाटै वृद्धवृद्धाको स्वास्थ्यमा प्रत्यक्ष पहुँच पुर्याउने यो कार्यक्रमले सामाजिक सुरक्षा, स्वास्थ्य सेवा र मानवीय संवेदनालाई जोड्दै उदाहरणीय अभ्यास स्थापित गरेको सरोकारवालाहरूको भनाइ छ । बुटवल उपमहानगरपालिकाले आगामी दिनमा पनि ज्येष्ठ नागरिक केन्द्रित यस्ता सेवामूलक कार्यक्रमलाई निरन्तरता दिने जनाएको छ ।
