अध्यक्ष शाहीले इडन इङ्लिस बोर्डिङ स्कुल आफ्नै होटल सञ्चालन गर्ने एकमात्र विद्यालय भएको दाबी गर्दै यहाँ हप्ताको चार दिन प्रयोगात्मक शिक्षण पद्धतिमार्फत पढाइ हुने जानकारी दिए । उनले विद्यालयले शैक्षिक, सांस्कृतिक तथा व्यवहारिक पक्षमा आफूलाई निरन्तर अब्बल बनाउँदै लगेको उल्लेख गर्दै विद्यार्थीलाई राष्ट्रिय स्तरसँग जोड्ने उद्देश्यले राष्ट्रिय कलाकारहरूलाई कार्यक्रममा आमन्त्रण गरिएको बताए ।

कार्यक्रममा गायक हेमन्त शर्मा, रवि रिमाल, गायिका सम्झना लामिछाने तथा डान्सर साजन गुरुङलगायत कलाकारहरूले आकर्षक प्रस्तुति दिएका थिए । विद्यालयका प्रधानाध्यापक शिवहरी भट्टराईका अनुसार कलाकारहरूको प्रस्तुतिले कार्यक्रमलाई थप जीवन्त बनाएको थियो ।

खाना महोत्सवमा कक्षा ११ र १२ का विद्यार्थीहरूले पाँच वटा स्टल सञ्चालन गरेका थिए । विद्यालयका अतिरिक्त क्रियाकलाप प्रमुख कुशल बस्यालका अनुसार विद्यार्थीहरूले सेलरोटी, शेर्पा चिया, मम, पकौडा, बटुक, फुल्की, चाट, स्यान्डविचलगायत विविध परिकारहरू तयार गरी प्रस्तुत गरेका थिए । यसले विद्यार्थीहरूमा उद्यमशीलता, आत्मनिर्भरता र व्यवहारिक सीप विकासमा सहयोग पुगेको विद्यालयको विश्वास छ ।

कार्यक्रममा अभिभावक तथा सर्वसाधारण दर्शकहरूको उल्लेखनीय सहभागिता रहेको थियो । विद्यालयमा अध्ययनरत विद्यार्थीहरूले नृत्य, गायन, नाटकलगायत विविध सांस्कृतिक प्रस्तुति प्रस्तुत गर्दै दर्शकको मन जितेका थिए । विद्यालयले सांस्कृतिक कार्यक्रममा निःशुल्क प्रवेशको व्यवस्था गरेको थियो ।

विद्यालय प्रशासनका अनुसार यस्ता कार्यक्रमले विद्यार्थीको प्रतिभा प्रस्फुटन, आत्मविश्वास अभिवृद्धि र व्यवहारिक शिक्षालाई मजबुत बनाउने भएकाले आगामी दिनमा पनि यस्ता कार्यक्रमलाई निरन्तरता दिइनेछ ।