प्यूठानमा थप दुई जनामा हैजाको संक्रमण पुष्टि भएको छ । केही दिन पहिले बिरामी भई उपचार गराइरहेका गौमुखी गाउँपालिका-५ का दुई जनामा हैजाको संक्रमण पुष्टि भएको हो ।
गौमुखी गाउँपालिका-५ खुङ्गका १२ वर्षीय बालक र ३५ वर्षीय पुरुषमा हैजाको सक्रमण पुष्टि भएको स्वास्थ्य कार्यालय प्यूठानका द्रुत प्रतिकार्य टोलिका फोकल प्रशन कौशलराज बैद्यले जानकारी दिए ।
प्रदेश जनस्वास्थ्य प्रयोगशाला बुटवलबाट उनीहरुमा हैजा पोजेटिभ रहेको रिपोर्ट आएको बैद्यले जानकारी दिए । प्यूठान अस्पतालमा उपचार गराइरहेका ६ जनामध्ये २ जनाको रिपोर्ट पोजिटेभ आएको प्यूठान अस्पतालका प्रमुख डाक्टर राजेन्द्र पौडेलले बताए ।
प्यूठान अस्पतालमा हाल गौमुखी गाउँपालिका वडा नं. ५ का ५ जना र स्वर्गद्धारी नगरपालिकाका १ जनाको उपचार भैरहेको छ । उनीहरुको अवस्था सामान्य रहेको डा पौडेलले बताए । एक दुई दिनमै बिरामीहरु डिस्चार्ज हुने उनले बताए ।
चार जना बिरामीको दिशाको नमुना कल्चरको लागि प्रदेश जनस्वास्थ्य प्रयोगशाला बुटवल पठाइएकोमा दुई जनाको रिपोर्ट पोजेटिभ आएको हो ।
