बजारमा छ्यापट्याप्ती गुट्खा खरिद विक्रि भइरहेको छ । हर्न पनि मुख्य राजमार्ग क्षेत्रमा बजाउन रोकिएको छैन् । नगरपालिकाले फोहरमैला वर्गीकरण गर्ने भनिएको छ। तर, नगरपालिकाले फोहोर छुट्टै उठाउने गरेको छैन ।

पशु दर्ता प्रणाली पनि अझै हुन सकेको छैन । नगरपालिकालाई नेपालमै पहिलो पटक शून्य पोलिथिन क्षेत्र ०७६ फागुन ३० गते नै घोषणा गरिएपनि यो पनि अहिले पूर्ण कार्यान्वयनमा छैन् ।

तिलोत्तमाको ६ लेन सडकमा हरियाली, लाईट र सिसिटिभी जडित हुंदा नगरपालिकाले वाहवाही पाए पनि भित्री बस्तीका जनताहरू खुसी भने छैनन ।

मुख्य राजमार्ग बाहेक भित्री सबै सडक कालोपत्रे हुन सकिरहेका छैनन । बालमैत्री घोषणा कार्यक्रम, पकेट मेरो पहिलो डस्विन कार्यक्रम पनि प्रभावकारी भएका छैनन ।

तिलोत्तमाको शान्ति चोकमा जडित पैदलयात्री आफैंले बटन थिचेर बाटो क्रस गर्न सक्ने ट्राफिक लाईटको प्रयोग धेरैले गरेकै छैनन । तिलोत्तमा नगरपालिकाले हालै मात्र योगीकुटी र भलबारीसम्मको दोहोरो सर्भिस लेनमा २० किलोमिटरको साइकल लेन तयार गरेर वाहवाही पाएको छ । तर, उक्त लेनको डिजाइन गलत छ । साइकल लेनलाई नाली तर्फको भागमा बनाउनुपर्नेमा ठिक विपरीत बनाइएको छ ।

यसले साइकल यात्रीहरूलाई थप जोखिम बढाएको जानकारहरू बताउंछन । डिजाइन गलत हुँदा १० लाखको लागतमा निर्माण भएको लेनको प्रयोग पनि कार्यान्वयनमा आउनेमा शंका छ । स्थानीय तहका जानकार युवराज कंडेल कार्यक्रम कार्यान्वयन गर्ने संयन्त्र तयार नहुंदै कार्यक्रम अगाडि बढाउंदा कार्यान्वयनमा समस्या देखिएको बताए ।

तिलोत्तमा नगरपालिकाका नगरप्रमुख रामकृष्ण खांणले अगाडि बढाइएका कार्यक्रमहरू कार्यान्वयन पूर्ण हुन नसकेको स्वीकार गरे ।

अहिले तिलोत्तमा नगरपालिकामा ६ जना मात्र नगरप्रहरी छन । बजारको व्यवस्थापनमा नगरप्रहरीको ठूलो भूमिका हुने भएपनि संख्या कम हुंदा समस्या भएको नगरप्रमुख खांणले बताए ।

उनले नगरपालिकाले अंगीकार गरेका कार्यक्रम कार्यान्वयनका लागि टोल विकास संस्थामार्फत नागरिक समक्ष अझै चेतना विस्तार गर्ने योजना रहेको बताए । साथै, अबको नगरसभाबाट २० नगरप्रहरी बनाउने र नगरप्रहरीको संख्या बढे सँगै कामको प्रगति देखिने उनको भनाई छ ।