भन्सार छलि गरेर १ करोड मुल्य बराबरको फूल र माला ल्याएको आशंकामा बरामद गरिएको फूल र माला ‘बैध’ बनाइएको छ ।
रूपन्देहीको मायादेवी गाउँपालिका–८ बसडिलवास्थित सिद्धार्थ कोल्ड स्टोरबाट बरामद भएको करोड बराबरको फूल र माला नेपालमै उत्पादन भएको दाबी गर्दै कोल्ड स्टोर सञ्चालकले प्रहरीलाई बिल बुझाएका छन् ।
लक्ष्मीदास मानन्धरले सञ्चालन गरेको कोल्ड स्टोरमा भण्डारण गरी राखिएको अवस्थामा भेटिएको करोड बराबरको फूल(माला पौडेल फ्लावरको २ हजार थान सयपत्री फूलका माला, बाटाखर्क एग्रो फार्मको ५९८ थान, कुलैही कट फ्लावरको १३ हजार ५ सय थान, केशवकुमार शाहको ५ हजार थान, आरजेको ८ हजार थान, आरकेको ८ हजार थान तथा हरि ओमको १५ बोरा सयपत्रीको माला राखेको बिल पेस गरेको जिल्ला प्रहरी कार्यालय रूपन्देहीका प्रवक्ता डिएसपी मनोहर भट्टले जानाकारी दिए ।
त्यस्तै सैनीको २ सय थान तथा नवदुर्गा ड्रिम क्रियसनको ४० बोरा सयपत्री, २७ बण्डल गुलाब, ४ वण्डल कार्नेसन र १७ बण्डल डेजीको बिल पेश गरेका छन्।
मानन्धरले गुल्मी, पाल्पा र नवलपरासीलगायत जिल्लाका ९ पुष्प व्यवसायीहरूको बिल पेस गरेको उनको भनाई छ ।
बिलको सत्यतथ्य पत्ता लगाउन र थप अनुसन्धानको लागि आन्तरिक राजश्व कार्यालय भैरहवा पठाईएको डिएसपी भट्टले जानकारी दिए।
