बुटवल । ठेक्का सम्झौता भएको ८ बर्ष सम्म पनि गुल्मीको एक सडक अझै कालोपत्रे हुन सकेको छैन् । ३ किलोमिटर सडक ८ बर्ष सम्म पनि सम्पन्न नहुँदा स्थानिय नागरिक आक्रोशित छन् ।
जिल्लाको सदरमुकाम तम्घास खाम्सेपानी–नयांगांउ–नादी–सूर्यटारी सडकको बिचमा झण्डै ३ किलो मिटर सडक ७ पटक सम्म म्याद थप हुँदा पनि अहिले सम्म कालोपत्रे हुन नसकेको हो ।
सडकको सुरुको खण्ड तम्घास–खाम्सेपानी अन्तरगत सुपा खोलासम्म साढे दुई किलोमिटर कालोपत्रे हुन नसकेको हो । अर्को खण्डको तीन किलोमिटर ३ वर्ष अघि नै कालोपत्रे भएको थियो ।
निर्माण व्यवसायीले पटकपटक ठेक्का सम्पन्न गर्ने म्याद थप्ने तर काम पुरा नगर्दा सडक समयमै निर्माण हुन सकेको छैन ।
व्यवसायिले अन्तिम पटक भन्दै २०८० साल असारसम्मको म्याद थप गरेको थियो । यो समयमा पनि कालोपत्रे गर्ने काम भएन ।
सडकको २०७१ साल असार ३१ गते सम्झौता भई २०७२ साल चैत्र ३० गते सम्पन्न गर्ने गरी लोहोनी एण्ड ब्रर्दश प्रालि चितवनले सम्झौता गरेको थियो । तर निर्माण व्यवसायीले समयमै काम गर्न नसक्दा त्यसक्षेत्रका नागरिकले सास्ती खेप्नु परेको हो ।
सडकको तम्घासदेखि खाम्सेपानी अन्तरगत सुपाखोलासम्म साढे दुई किलोमिटर सडक कालोपत्रे गर्ने गरि ७ करोड १९ लाख ८७ हजार ७० रुपैयां लागतमा निर्माणको जिम्मा दिइएकोे थियो ।
सडक खण्डको साढे दुई किलोमिटर भन्दा बांकी खण्डको केहि ठाउंमा २ वर्ष अघि नै कालोपत्रे भएको छ ।
सडकको अहिले भौतिक प्रगति ९० प्रतिशत, वित्तिय प्रगती ७६ प्रतिशत भएको सडक पूर्वाधार विकास कार्यालय गुल्मीले जनाएको छ । प्रगति भनिए पनि सडकको मुख्य काम कालोपत्रे भएको छैन ।
सडकको बेस निर्माण र कालो पत्रे काम बांकी रहेको सडक पूर्वधार विकास कार्यालय गुल्मीका प्रमुख सचित्तानन्द चौधरीले बताए ।
उनले अब पनि ठेकेदारले काम नगरे ठेक्का सम्झौता तोड्ने बताए । अनिल खत्री, गुल्मी
