पाल्पाको तिनाउ गाउंपालिका वडा नं. ३ स्थित माथिल्लो सिद्धबाबा मन्दिर दर्शन तथा पूजापाठको लागि देशभर चर्चित छ भने बुटवल ३ स्थित तल्लो सिद्धबाबाको नामले परिचित धाम विकास समिति विवाह, व्रतवन्ध तथा विभिन्न धार्मिक कार्यहरुका लागि चर्चित छ ।

मन्दिर र धाम विकास समितिमा व्यवस्थापन समिति समेत छुट्टाछ्ुट्टै गठन गरि काम गर्दै आएका छन् ।

तल्लो सिद्धबाबा धाम विकास समितिले विवाह, व्रतबन्ध जस्ता धार्मिक कार्यहरु गराएवापत सेवा शुल्क भन्दै निश्चित रकम लिने गर्छ ।
तर दाताहरुबाट संकिलत सोहि रकम समेत अनियमितता गरिएका कृते रसिदहरु सार्वजनिक भएका छन् ।

समितिले दाताहरुलाई दिएका पहिलो रसिद र त्यसैको छायां प्रतिमा फरक फरक रकम लेखिएको भेटिएपछि धामविकास समितिमा हुने गरेको अनियमितता छताछुल्ल भएको छ ।

सार्वजनिक भएका रसिदमा दाताबाट १ हजार ५ र १ हजार १ सय ५ रुपैयां लिएको उल्लेख गरिएको छ भने तीनै रसिदका छायाँ प्रतिमा भने ५ सय ५ रुपैयां लेखिएको छ ।

२०७९ साल असार २२ गते सैनामैना ४ रुपन्देहीका कुमार कार्कीले धामविकास समितीलाई रसिद काटेरै १ हजार १ सय ५ रुपैयां बुझाएपनि सोहि रसिदको छायां प्रतिमा भने ५ सय ५ रुपैया मात्रै लेखिएको छ ।

गत मंसिर २६ गते रुपन्देहीको हिरापुरकी तिला कुमारी खड्का र मंसिर २८ गते बुटवल ११ की गंगा रायमाझीले पनि रसिद काटेरै धाम विकास समितिलाई १ हजार १ सय ५ रुपैयां प्रदान गरेका थिए । तर गंगा र तिला कुमारीलाई दिईएका रसिदका छायां प्रतिमा पनि ५ सय ५ रुपैयां मात्र उल्लेख गरिएको छ । पछिल्लो समय समितिमा विवाद उत्पन्न भएपछि नेतृत्व चयन हुन सकेको छैन ।

गत मंसिरमा नेतृत्व चयन हुनुपर्ने भएपनि अधिवेशनमा सहमती नजुटेपछि काम चलाउ अध्यक्षको जिम्मेवारी कृष्ण प्रसाद तिमिल्सेनाले नै सम्हाल्दै आएका छन् ।

यहि बीचमा नगदी रसिदहरु सार्वजनिक गरेर आफुलाई फसाउन र बदनाम गराउन पुरानो घटना बाहिर ल्याईएको उनको दावी छ । तिमिल्सेनाका अनुसार दाताबाट रकम लिएर काटिएका रसिदमै कृते गरिएको पाईएपछि समितिले १ महिना अघि नै धाम विकास समितिका कर्मचारी तारानाथ उपाध्याय र पुजारी भुवन ज्ञवालीलाई निलम्बन गरेको थियो ।