बुटवलमा रोजगार मेला शुरू भएको छ ।
नेपाल उद्योग वाणिज्य महासंघ र बुटवल उद्योग वाणिज्य संघ रुपन्देही संयुक्त आयोजनामा मंगलवारबाट दुई दिने मेला शुरु भएको हो ।
मेलाको उद्घाटन गर्दै नेपाल उद्योग वाणिज्य महासंघ लुम्बिनीका प्रदेशका अध्यक्ष कृष्णप्रसाद शर्माले नेपाली युवा कामको खोजीमा विदेश जानुपर्ने र नेपाली उद्योगीले बाहिरबाट कामदार ल्याउनु पर्ने वाध्यता रहेको बताए ।
कामको लागि बाहिर जाने प्रवृत्ति रोक्न र व्यवसायीले बाहिरबाट कामदार ल्याउनु पर्ने वाध्यता अन्त्य गर्न सरकारले तारतम्य मिलाउनु पर्ने बताए ।
बुटवल उद्योग वाणिज्य संघ रुपन्देहीका अध्यक्ष तथा नेपाल उद्योग वाणिज्य महासंघका सदस्य उज्ज्वलप्रसाद कसजूले उद्योग सञ्चालनका लागि दक्ष जनशक्तिको अभाव रहेको बताए ।
साथै पढेलेखेका युवाहरू कामको खोजीमा विदेशीने विषयलाई मध्येनजर गरेर दुवै पक्षको आवश्यकता पूर्ति गर्नका लागि मेलाको आयोजना गरिएको उनको भनाइ थियो ।
मेलामा २९ वटा उद्योग प्रतिष्ठानको सहभागिता छ । नेपालबाट मासिक ८० देखि ९० हजार युवा जनशक्ति विदेशीने गरेको तथयांक छ ।
