बुटवल । नेपाल एयरलाइन्स आगामी जेठ १५ (मे २९) बाट गौतमबुद्ध विमानस्थलबाट उडान गर्ने तयारी गरेको छ । लामो समयदेखि गृहकार्य गरिरहेको निगमले अब भने भैरहवालाई दिल्ली र मलेसियासंग जोड्ने भएको छ ।
निगमले दिल्ली र मलेसिया सातामा एक÷एक उडान गर्ने बताएको छ । यसका लागि सम्बन्धित मुलुकहरूसंग अनुमति प्रक्रियामा रहेको निगमका प्रवक्ता रमेश पौडेलले बताए ।
निगमले हाल काठमाडौं–मलेसियामा सातामा पांचवटा उडान गर्छ । त्यस्तै काठमाडौं–दिल्ली सातामा १४ उडान गर्छ ।
गौतमबुद्ध विमानस्थलबाट उडान सुरू गरेपछि निगमले भैरहवा–दिल्ली–काठमाडौं र काठमाडौं–मलेसिया–भैरहवा उडान हुनेछ । हाल भने गौतमबुद्ध अन्तर्राष्ट्रिय विमानस्थलबाट कुनै पनि अन्तर्राष्ट्रिय उडान भएको छैन् ।
झन्डै एक महिनादेखि जजिरा एयरवेजले उडान बन्द गरेको छ । जजिराले वैशाख ७ गते देखि भैरहवा–कुवेत उडान बन्द गरेको विमानस्थल कार्यालयले बताएको छ ।
पछिल्लो समय जजिराले कुवेत–भैरहवा सातामा तीन उडान गर्दै आइरहेको थियो । तर उडान अवतरणमा समय तालिका नमिलेपछि स्थगन गरेको एयरलाइन्सले बताएको छ ।
एयरलाइन्सका जिएसए सोसाइटी इन्टरनेशनल ट्राभलका अध्यक्ष रवि चन्द्र सिंहका अनुसार समयमै ट्रान्जिट गराउनका लागि एयरलाइन्सले उडान तालिका परिवर्तन गर्दैछ ।
प्राधिकरणका अनुसार जजिराले रातिको साढे १ बजे विमानस्थलमा ल्यान्ड र साढे २ मा कुवेतका लागि उड्ने तालिका मागेको हो । तर रातिको समय उपकरण र कर्मचारी थप चलाउनुपर्ने भएकाले तत्काल सम्भव नरहेको प्राधिकरणका सूचना अधिकारी ज्ञानेन्द्र भुलले बताए ।
हाल विमानस्थलमा दिउंसो आन्तरिक उडान हुन्छ । रात्रीकालीन उडानका लागि भने मासिक ४० लाखभन्दा बढी खर्च हुने देखिएको उनले बताए ।
