बुटवल । बुटवल सरसफाई तथा वातावरण संरक्षण सहकारी संस्था लिमिटेड बुटवल ७ को तेस्रो वार्षिक साधारणसभा शनिबार सम्पन्न भएको छ । साधारणसभामा बोल्दै बुटवल उपमहानगरपालिकाका प्रमुख खेलराज पाण्डेयले सहकारीको अभियानलाई नगरपालिकाका पूर्ण साथ रहेको भन्दै फोहोर प्रशोधन केन्द्र बनाइने बताए ।
त्यसको लागि वडाबासीहरु सबैकौ ऐकबद्धता हुनुपर्नेमा जोड दिए । सहकारीले बुटवल ७ र ८ को फोहोर संकलन र व्यवस्थापनको काम गरेको छ । बुटवल उपमहानगरपालिका, शिवनगर सामुदायिक बन र सहकारीको समन्वयनमा फोहोर व्यवस्थापनको दिगो परियोजना अघि बढ्न थालेको हो ।
सहकारी संस्थाका अध्यक्ष अध्यक्ष कृष्णबहादुर कार्कीले नमूना फोहोर प्रशोधन केन्द्र बनाउन सबैको साथ र सहकार्य आवश्यक रहेको बताए । त्यति मात्र हैन, फोहोर व्यवस्थापनको कार्यलाई कृषि उत्पादन, व्यवस्थापन र प्रवद्र्धनसँग जोड्दै जाने कार्कीको भनाइ छ । घरमा संकलित फोहोर व्यवस्थापन भएपछि वडाबासी समेत अहिले खुसी छन् ।
सहकारीमा १ हजार ६७ शेयर सदस्य आबद्ध भइसकेका छन् । खेर गइरहेको फोहोराबाट कम्पोष्टमला सहित क्रमस बैकल्पिक उर्जा उत्पादन गरी विक्री वितरण जाने र नर्सरी निर्माण तथा व्यवस्थापन मार्फत हरियाली प्रवद्र्धन गर्ने योजना रहेको संस्थाका सचिव गेहेन्द्रराज न्यौपानेले जानकारी दिए ।
पूर्व नगर प्रमुख शिवराज सुवेदीले योजनालाई सफल बनाउनुपर्ने बताए । कुनै बेला समयमा फोहोर व्यवस्थापन नहुँदा प्रदूषित बनेको वडा अहिले सफा र सुग्घर बनेका छन । घर–दैलोबाट सिधै गाडीमा फोहोर फाल्न पाएपछि स्थानीयले प्लाष्टिकजन्य फोहोर जलाउन समेत छाडेका छन् । कार्यक्रममा नगर उपप्रमुख सावित्रादेवी अर्याल, सहकारीका उपाध्यक्ष ठानेश्वर बस्याल लगायतले बोलेका थिए ।
