बागेश्वरी कला केन्द्र तथा संगीत एकेडेमी २५ औं वर्षमा देवशिद्ध खानेपानी तथा सरसफाई उपभोक्ता संस्था द्वारा सार्वजनिक शौचालय र धारा निर्माण भैरहवाको ‘सिद्धार्थ भिलासा’लाई ‘पाँच तारे होटल’को मान्यता पाल्पामा १९ वर्षीया पद्मा सुनारकाे हत्या गर्ने सार्वजनिक जमुनाह नाकामा रहेको अध्यागमन कार्यालय करिब तीन वर्षदेखि कामविहीन एमाले रुपन्देहीको अधिवेशन जेठमा नुहाउन गएकी प‌द्माको छिमेकीबाटै हत्या, सागरको घरमा भेटियो रगत लतपतिएको खुर्पा र किशोरीको मोबाइल लुम्बिनी वल्र्ड स्कुलले असल अभिभाकत्व र तनाव व्यवस्थापन तालिम आयोजना गर्दै लुम्बिनी प्रादेशिक अस्पतालमा निसन्तान दम्पत्तिका लागि ‘आइयुआई’ सेवा सुरु ड्रिम युनिक रुपन्देही सुपरलिग: डिभिजन ‘ए’काे पहिलाे खेलमा सैनामैना विजयी                
समाचार :

कति बलिया छन् कतार विश्वकप खेल्ने ३२ टोली ?

दोहा । कतारमा दुई सातापछि सुरु हुने विश्वकप फुटबलमा घरेलु टोलीसहित विश्वभरका ३२ टोली सहभागी हुँदैछन् । एसियाबाट दक्षिण कोरिया, कतार, जापान, इरान, अस्ट्रेलिया र साउदी अरबसहित ६ टोली सहभागी हुनेछन् । अफ्रिकाबाट क्यामरुन, घाना, मोरक्को, सेनेगल र ट्युनिसिया खेल्दैछन् ।

दक्षिण अमेरिकाबाट अर्जेन्टिना, ब्राजिल, इक्वेडर र उरुग्वेसहित चार टोली सहभागी हुँदा उत्तर, मध्य तथा क्यारेबियन क्षेत्रबाट क्यानडा, कोस्टारिका, मेक्सिको र संयुक्त राज्य अमेरिकाले खेल्दैछन् ।

युरोपबाट बेल्जियम, क्रोएसिया, डेनमार्क, इङ्गल्यान्ड, जर्मनी, फ्रान्स, नेदरल्यान्ड्स, पोल्यान्ड, पोर्चुगल, सर्विया, स्पेन, स्वीट्जरल्यान्ड र वेल्ससहित १३ टोली विश्व फुटबलको महाकुम्भमा सहभागी हुँदैछन् ।

एसिया

विश्वकप इतिहासको एकै संस्करणमा सर्वाधिक एसियाली टोली यसपटक सहभागी हुँदैछन् । विश्वकप फुटबलमा एसियाली टोली सेमिफाइनलसम्म पुगेको इतिहास छ । दक्षिण कोरिया २० वर्षअघि आयोजित विश्वकपमा सेमिफाइनलसम्म पुगेको थियो ।

त्यसबाहेक एसियाबाट विश्वकपको सेमिफाइनल पुगेको इतिहास छैन । दक्षिण कोरिया लगातार १०औं र समग्रमा ११औं पटक विश्वकप खेल्न लागेको हो । दक्षिण कोरियाले सन् १९५४ मा पहिलोपटक विश्वकप खेलेको थियो ।

जापान सातौंपटक विश्वकप खेल्दैछ । यसअघि सन् २००२, २०१० र २०१४ मा प्रि-क्वार्टरफाइनलसम्म पुगेको थियो । जापानले पहिलोपटक सन् १९९८ मा विश्वकप खेलेको थियो ।

एसियाबाट छनोट खेल्दै आएको अस्ट्रेलिया छैटौंपटक विश्वकप खेल्दैछ । अस्ट्रेलिया सन् २००६ मा मात्र पहिलो चरण पार गर्दै प्रि-क्वार्टरफाइनलसम्म पुगेको थियो । अस्ट्रेलियाले पहिलोपटक सन् १९७४ मा विश्वकप खेलेको थियो ।

इरानले हालसम्म विश्वकपमा पहिलो चरण पार गर्न सकेको छैन । इरानले पहिलोपटक सन् १९७८ मा विश्वकप खेलेको थियो ।

पहिलो सहभागितामै सन् १९९४ मा दोस्रो चरणसम्म पुगेको साउदी अरबले त्यसयता पाँचपटक विश्वकप खेले पनि पहिलो चरण पार गर्न सकेको छैन ।

यसपटकको आयोजक कतार पहिलोपटक विश्वकप खेल्दैछ । विश्वकप आयोजकका रुपमा कतारले विश्वकपमा सोझै छनोट पाएको हो ।

अफ्रिका

अफ्रिकाबाट विश्वकपमा कुनै पनि टोली क्वार्टरफाइनलभन्दा अगाडि बढ्न सकेको छैन । सन् १९९० मा क्यामरुन, सन् २००२ मा सेनेगल र २०१० मा घाना क्वार्टरफाइनलसम्म पुगेका थिए । पहिलोपटक सन् १९८२ को विश्वकप खेलेको क्यामरुन समग्रमा आठौंपटक यो प्रतियोगितामा सहभागी हुँदैछ ।

मोरक्को सन् १९८६ को संस्करणमा दोस्रो चरणसम्म पुगेको थियो । त्यसबाहेक सहभागी भएका अन्य चार अवसरमा भने समूहगत चरणबाटै बाहिरिएको थियो । मोरक्कोले सन् १९७० मा पहिलोपटक विश्वकप खेलेको थियो ।

घाना लगातार चौथोपटक र समग्रमा चौथोपटक नै विश्वकप खेल्दैछ । सन् २०१० को विश्वकपमा क्वार्टरफाइनलसम्म पुग्नुबाहेक अन्य तीन सहभागितामा भने घाना पहिलो चरणबाटै बाहिरिएको थियो ।

पहिलो सहभागितामै सन् २००२ मा क्वार्टरफाइनल पुगेको सेनेगल तेस्रोपटक विश्वकप खेल्न लागेको हो । यसघि सन् २०१८ को विश्वकप पनि खेलेको थियो । तर, समूहगत चरणबाटै बाहिरियो ।

छैटौंपटक विश्वकप खेल्न लागेको ट्युनिसियाले यो प्रतियोगितामा हालसम्म पहिलो चरण पार गर्न सकेको छैन । ट्युनिसियाले सन् १९७८ मा पहिलोपटक विश्वकप खेलेको थियो ।

दक्षिण अमेरिका

दक्षिण अमेरिका विश्वकपमा सबैभन्दा सफल देश रहेको महादेश हो । दक्षिण अमेरिकाको ब्राजिलले पाँचपटक विश्वकप जितेको छ । अर्जेन्टिना र उरुग्वेले समान दुईदुई पटक विश्वकप जितेका छन् । ब्राजिल विश्वकपका हालसम्मका सबै २१ संस्करण खेल्ने टोली हो । उसले सन् १९५८, १९६२, १९७०, १९९४ र २००२ मा विश्वकप जितेको थियो । ब्राजिल विश्वकपमा ११ पटक कम्तिमा सेमिफाइनलसम्म पुगेको छ ।

यस्तै अर्जेन्टिना समग्रमा १८औं पटक विश्वकप खेल्दैछ । अर्जेन्टिनाले सन् १९७४ यताका हरेक संस्करण खेलिरहेको छ । सन् १९७८ र १९८६ को विश्वकप जितेको अर्जेन्टिना हालसम्म पाँचपटक सेमिफाइनल र चारपटक फाइनल पुगेको छ ।

सन् १९३० मा आयोजित पहिलो विश्वकप जितेको उरुग्वे समग्रमा १४औं पटक विश्वकपमा सहभागी हुँदैछ । सन् १९५० को पनि संस्करण जितेको उरुग्वे हालसम्म पाँचपटक सेमिफाइनल पुगेको छ ।

इक्वेडर चौथोपटक विश्वकप खेल्न लागेको हो । पहिलो पटक सन् २००२ को विश्वकप खेलेको इक्वेडरले एक पटकमात्र पहिलो चरण पार गरेको छ । सन् २००६ मा इक्वेडर प्रि-क्वार्टरफाइनलसम्म पुगेको थियो ।

उत्तर, मध्य अमेरिका तथा क्यारेबियन क्षेत्र

मेक्सिको विश्वकप सर्वाधिक खेल्ने उत्तर तथा मध्य अमेरिकी टोली हो । मेक्सिकोले हालसम्म १६ पटक विश्वकप खेलिसकेको छ । तर, उत्तर, मध्य अमेरिका तथा क्यारेबियन क्षेत्रबाट कुनै पनि टोलीले विश्वकपमा सेमिफाइनल पार गर्न सकेको छैन ।

अमेरिका सन् १९३० मा आयोजना भएको पहिलो विश्वकपमा सेमिफाइनलसम्म पुगेको थियो । त्यसयता कुनै पनि उत्तर, मध्य अमेरिका तथा क्यारेबियन क्षेत्रका टोलीले क्वार्टरफाइनल पार गर्न सकेका छैनन् । मेक्सिको सन् १९७० र १९८६ मा क्वार्टरफाइनलसम्म पुगेको थियो । उसले सन् १९९४ यताका हरेक विश्वकप संस्करण खेलिरहेको छ । ११औं पटक विश्वकप खेल्न लागेको अमेरिका लगातार सात संस्करण खेलेपछि अघिल्लो विश्वकपमा भने छनोट हुन सकेको थिएन ।

क्यानडा ३६ वर्षपछि पहिलोपटक र समग्रमा दोस्रोपटक विश्वकप खेल्दैछ । यसअघि सन् १९८६ मा भएको पहिलो सहभागितामा क्यानडाले पहिलो चरण पार गर्न सकेको थिएन ।

सन् २०१४ को संस्करणमा क्वार्टरफाइनलसम्म पुगेको कोस्टारिका समग्रमा छेटौंपटक विश्वकप खेल्दैछ । कोस्टारिकाले पहिलोपटक सन् १९९० मा विश्वकप खेलेको थियो ।

युरोप

विश्वकपमा महादेशका हिसाबले युरोप सर्वाधिक सफल रहेको छ । जर्मनी र इटालीले ४/४ पटक, फ्रान्सले दुई तथा इङ्गल्यान्ड र स्पेनले एकएक पटक विश्वकप जितेका छन् । इटाली भने यसपटक छनोट हुन सकेन । उसले सन् २०१८ को विश्वकप पनि खेल्न सकेको थिएन ।

२०औं पटक विश्वकप खेल्न लागेको जर्मनी यसअघि सन् १९५४, १९७४, १९९० र २०१४ मा विश्व च्याम्पियन बनेको थियो । जर्मनीले विश्वकपमा १३ पटक सेमिफाइनलसम्मको यात्रा तय गरेको छ ।

साविक विजेता फ्रान्स समग्रमा १६औं पटक विश्वकप खेल्दैछ । फ्रान्स हालसम्म विश्वकपमा ६ पटक सेमिफाइनल र तीनपटक फाइनल पुगेको छ ।

स्पेन पनि १६औं पटक विश्वकपमा सहभागी हुने भएको छ । सन् २०१० को संस्करण जितेको स्पेन सन् १९७८ यताका हरेक संस्करण खेलिरहेको छ । स्पेन विश्वकपमा दुईपटकमात्र सेमिफाइनल पुगेको छ । स्पेनले सन् १९५० मा पहिलोपटक सेमिफाइनल यात्रा तय गरेको थियो ।

बेल्जियम १४औं पटक विश्वकप खेल्दैछ । उसले सन् १९८६ र सन् २०१८ को संस्करणमा सेमिफाइनल यात्रा तय गरेको थियो ।

१३औं पटक विश्वकप खेल्न लागेको सर्बिया दुईपटक सेमिफाइनलसम्म पुगेको इतिहास छ । सर्बियाले सन् १९३० र १९६२ मा अन्तिम चारको यात्रा तय गरेको थियो ।

सन् १९६६ को विश्वकप जितेको इङ्गल्यान्ड १६औं पटक विश्वकप खेल्दैछ । इङ्गल्यान्ड सन् १९९० र २०१८ का संस्करणमा सेमिफाइनलसम्म पुगेको थियो ।

लगातार पाँचौं र समग्रमा आठौं पटक विश्वकप खेल्न लागेको पोर्चुगल सन् १९६६ र २००६ का संस्करणमा सेमिफाइनलसम्म पुगे पनि अगाडि बढ्न सकेको थिएन ।

गत संस्करणमा फाइनलसम्म पुगेको क्रोएसिया समग्रमा छैटौं पटक विश्वकप खेल्दैछ । क्रोएसियाले पहिलोपटक सन् १९९८ मा विश्वकप खेलेको थियो । क्रोएसिया पहिलो सहभागितामै सेमिफाइनलसम्म पुगेको थियो । त्यसयता २० वर्षपछि गत संस्करणमा अन्तिम चारको यात्रा तय गर्दै फाइनल पुगेको थियो ।

सन् १९८६ मा पहिलोपटक विश्वकप खेलेको डेनमार्क समग्रमा छैटौंपटक यो प्रतियोगिता खेल्दैछ । डेनमार्कले सन् १९९८ को विश्वकपमा क्वार्टरफाइनलसम्मको यात्रा तय गरेको थियो । डेनमार्क हालसम्म सेमिफाइनल पुग्न सकेको छैन ।

नेदरल्यान्ड्स ११औं पटक विश्वकप खेल्दैछ । नेदरल्यान्ड्सले सन् १९७४, १९७८ र २०१० को संस्करणमा फाइनलसम्मको यात्रा तय गरे पनि उपाधि जित्न सकेको छैन । पहिलोपटक सन् १९३४ को विश्वकप खेलेको नेदरल्यान्ड्स गत संस्करणमा भने छनोट हुन सकेको थिएन । नेदरल्यान्ड्सले विश्वकपमा ५ पटक कम्तिमा सेमिफाइनलसम्मको यात्रा तय गरेको छ ।

सन् १९७४ र १९८२ को विश्वकपमा सेमिफाइनलसम्म पुगेको पोल्यान्ड समग्रमा नवौं पटक विश्वकप खेल्दैछ ।

वेल्स ६४ वर्षपछि विश्वकप खेल्दैछ । यसअघि पहिलोपटक सन् १९५८ को विश्वकप खेलेको वेल्स त्यति वेला क्वार्टरफाइनलसम्म पुगेको थियो ।

स्वीट्जरल्यान्डले समग्रमा १२औं पटक विश्वकप खेल्दैछ । स्वीट्जरल्यान्ड सन् १९३४, १९३८ र १९५४ को विश्वकपमा क्वार्टरफाइनलसम्म पुगेको थियो । स्वीट्जरल्यान्डले हालसम्म विश्वकपको सेमिफाइनल खेल्न सकेको छैन ।

तिनाउ न्युज

तिनाउ न्युज डटकम बुटवल बाट प्रकाशित हुने अनलाइन पत्रिका हो !

लेखक बाट थप

प्रतिक्रिया दिनुहोस !

सम्बन्धित समाचार