रुपन्देही । नेकपा एकीकृत समाजवादी पार्टीका केन्द्रीय सदस्य तथा लुम्बिनी प्रदेश सचिव राजु गुरुङले सर्वोच्च अदालत र निर्वाचन आयोग अमुक पार्टीको कार्यालयजस्तो भएर आफ्नो विरुद्धमा फैसला आएको आरोप लगाएका छन् ।
सर्वोच्चको फैसलामाथि प्रश्न उठाउँदै गुरुङले निर्वाचन आयोग र सर्वोच्च अदालत एउटा पार्टीको कार्यालय जस्तो भएर आफू विरुद्ध फैसला गरेको आरोप लगाएका हुन् ।
गुरुङले रुपन्देही २ बाट प्रतिनिधिसभा सदस्यका लागि दिएको उम्मेदवारी दिए पनि बैङ्किङ कालोसूचीमा रहेपछि निर्वाचन आयोगले उनको उम्मेदवारी खारे गरेको थियो ।
आयोगको निर्णय विरुद्ध सर्वोच्च पुगेका गुरुङको उम्मेदवारी खारेज हुने निर्णयलाई सर्वोच्चले सदर गरेको थियो ।
राष्ट्रिय जनमुक्ति पार्टी र सत्तारुढ गठबन्धन दलद्वारा शनिवार बुटवलमा आयोजना गरिएको पत्रकार सम्मेलनमा गुरुङ अदालतको फैसलामाथि खनिएका हुन् ।
रुपन्देही २ मा नेकपा एमालेका तर्फबाट प्रतिनिधि सभाका लागि उम्मेदवार बनेका विष्णु पौडेल एकल रूपमा अघि बढ्नका लागि आफू विरुद्ध अप्रत्याशित रूपमा उजुरी परेको उनले आरोप लगाए ।
आफू जस्तै मुलुकभर १५२ ना उम्मेदवारको कम्पनी कालोसूचीमा भए पनि उनीहरू उम्मेदवारी खारेज नभई आफ्नो मात्र खारेज भएको भन्दै गुरुङले आक्रोश पोखे ।
गुरुङको उम्मेदवारी खारेज भएपछि रुपन्देही २ बाट गठबन्धनले राष्ट्रिय जनमुक्ति पार्टीका केशवबहादुर थापालाई समर्थन गरेको छ ।
शनिवार गठबन्धन दल र जनमुक्तिको तर्फबाट सामूहिक पत्रकार सम्मेलन आयोजना गरिएको थियो ।
