बुटवल । नेकपा एमालेका प्रदेशसभा उम्मेदवार भोजप्रसाद श्रेष्ठले बुटवलको विकास र जनताको सेवा बाहेक आफूले केही नसकेको बताएका छन । रुपन्देही–२ (२) का उम्मेदवार श्रेष्ठले आफूले यस अघि गरेका कामलाई जनताले देखिरहेको बताउँदै बुटवलबासीले निस्पक्ष मूल्याङकन गर्ने दावी गरे ।
बुटवलमा सञ्चारकर्मीहरुसँगको भेटघाटनमा बोल्दै एमाले प्रदेश उपाध्यक्ष समेत रहेका नेता श्रेष्ठले बुटवलका समस्याप्रति आफू जानकार रहेको बताउँदै जनताको मनोभावनालाई छोएर बुटवललाई आर्थिक र सांस्कृतिक केन्द्रको रुपमा विकास गर्न जुटने बताए ।
‘यहाँ विकासका ठूलो पूर्वाधारहरु बनिसकेका छन’ उम्मेदवार श्रेष्ठले भने, ‘नेपालकै पुरानो मध्येको व्यारिक केन्द्र बुटवलका समस्यालाई दीर्घकालीन रुपमा समाधान गर्दै आर्थिक र सांस्कृति राजधानीको रुपमा विकास गर्ने मेरो योजना छ ।’ उम्मेदवार श्रेष्ठले बुटवलका अधुरा योजनालाई पूरा गर्ने दायित्व आफ्नो रहेको बताए ।
‘ठूला योजनालाई खवरदारी र प्रभावकारी अनुगमनको खाँचो छ’ श्रेष्ठले भने, ‘मेरो काम गर्ने सक्ने इच्छाशक्ति छ । त्यसको लागि मिडियाका साथीहरुको पनि साथ र पूर्ण सहयोगको अपेक्षा गरेको छ । बुटवललाई बनाउने दायित्व तपाई हामी सबैको हो ।’ केही ठूला योजनाहरु कानूनी बाध्यताले प्रभावकारी रुपमा अगाडि बढन सकेका छैनन । त्यस्तै शिक्षा, स्वास्थ्य र रोजगारको क्षेत्रमा अझै काम गर्न बाँकी रहेको उनको भनाइ छ । श्रेष्ठले बुटवलमा अब मानवीय विकास गर्न पनि लाग्नुपर्ने बताए । बुटवलको मेयर हुँदा पनि आफू बुटवललाई विकासको गतिमा अगाडि बढाएको कुरा बुटवलबासीलाई अबगत रहेको श्रेष्ठको भनाइ छ ।
श्रेष्ठ यस अघि २०७४ को प्रदेशसभा निर्वाचनमा पनि रुपन्देही २ (२) बाट भारी मतले विजयी भएका थिए । उनी प्रदेशसभा जनताका धेरै समस्या उठाउने नेतामा समेत पर्छन । शंकर पोखरेल नेतृत्वको सरकारका स्वास्थ्य तथा जनसंख्या मन्त्री भएर उनले निःशुल्क रगत, कोभिडकालमा अक्सिजन प्लान्ट स्थापना लगाएका क्षेत्रमा धेरै महत्वपूर्ण काम गरेको जस श्रेष्ठलाई जान्छ ।
