बुटवल । शिक्षा विकास तथा समन्वय इकाई भैरहवाका कार्यालय सहयोगी शैलेन्द्र लोधले सरकारी मोटरसाईकलको दुरुपयोग गरेको पाइएको छ । रुपन्देहीको गैडहवा घर भई भैरहवामा बस्ने लोधले सरकारी नं. प्लेटको प्र ३–००१ ब १७१४ नं को मोटरसाईकल दुरुपयोग गरेको पाइएको हो ।
समाचार स्रोतका अनुसार उनी सँग सवारी चालक अनुमती पत्र (लाईसेन्स) समेत छैन् । हरेक हप्ताको शुक्रबार लोध विना लाईसेन्स घर गैडहवा जाने आउँने गर्दछन् । त्यति मात्र होईन कार्यालय समय बाहिर पनि भैरहवाका सडकमा उनले खुल्याम मोटरसाईकल चलाउँदै आएका छन् । ९ महिना अघि मात्र कार्यालय जागिर खाएका लोध शिक्षा विकास तथा समन्वय ईकाई भैरहवाका लेखापाल महंगो लोधको सालो हो । महंगो लोध भन्सार कार्यालयका समेत लेखापाल हुन ।
शिक्षा विकास तथा समन्वय ईकाइमा लेखापालको दरबन्दी नहुँदा उनै महंगो लोध बेला बेलामा आएर समन्वय ईकाईमा लेखापालको रुपमा कार्य गर्दै आएका छन् ।
कार्यालय सहयोगी लोधले कार्यालयको कामले मात्र आफुले मोटरसाईकल चलाउने गरेको बताए । उनले आफ्नो लाईसेन्स नभएको समेत स्वीकार गरे । ‘बजारमा त लैजान्न । अपिसको कामले हो मोटरसाईकल लैजाने । तर भोली देखि लैजान्न’ उनले भने ।
शिक्षा विकास तथा समन्वय ईकाई भैरहवाका कार्यालय प्रमुख माधव बञ्जाडेले एक पटक बाहिर मोटरसाईकल लगेको सूचना आफुले पनि पाएको भन्दै शैलेन्द्रलाई पुन सचेत गराउने बताए । ‘कोलेनीकामा जान परे लाईसेन्स भएकैलाई जान भनेको छु । फेरी त्यस्तो गरेको भए म सचेत गराउँछु । अब त्यो रोकिन्छ’ उनले भने ।
