रेसुंगाका मेयर तथा कांग्रेस नेता चढेको गाडीले ठक्कर दिएर घाइते बनाएर ती घाइतेको उद्दार नगरी भाग्न खोजेपछि स्थानीयले नेताहरूलाई घेरेर हप्काएका छन् ।
स्थानीय दुर्घटनापछि घाइतेको उपचार गर्नुको साटो भाग्न खोजेको भन्दै आक्रोशित भएका थिए । शुक्रबार राती बुटवलको तामनगरमा गुल्मीको रेसुंगा नगरपालिकाको गाडीले मोटरसाइकललाई ठक्कर दिँदा मुसिकोट नगरपालिका–१ निवासी रञ्जीत खत्री घाइते भएका हुन् ।
उनको हाल बुटवलको बेलबासस्थित एडमनसिटी अस्पतालमा उपचार भइहेको इलाका प्रहरी कार्यालय बुटवलले जनाएको छ ।
शुक्रबार राती दाङमा कांग्रेस बैठकमा सहभागी भएर बुटवलतर्फ आउँदै गरेको रेसुंगा नगरपालिकाको बा ०२–०१६ नम्बरको गाडीले बुटवल उपमहानगरपालिका–१४ तामनगरमा मोटरसाइकललाई ठक्कर दिएको थियो ।
रेसुंगा नगरपालिकाका नगर प्रमुखसमेत रहेका कांग्रेस गुल्मी सभापति खिलध्वज पन्थी सवार गाडीले नागरिकलाई ठक्कर दिएर भागेको भन्दै स्थानीयले विरोध जनाएका हुन् ।
दुर्घटनापछि गाडी नरोकी अघि बढेपछि आक्रोशित स्थानीयबासीले गाडीमा सवार नेपाली काँग्रेस लुम्बिनी प्रदेशका उपसभापति भुवन श्रेष्ठमाथि हातपातको प्रयास गरेका थिए ।
गाडी चालकलाई प्रहरीले नियन्त्रणमा लिएको प्रहरी नायब उपरीक्षक इन्द्र रानाले जानकारी दिएका छन् । यसबारे प्रतिक्रिया लिन नेताहरूलाई सम्पर्क गरेपनि फोन उठाएनन् ।
घाइते खत्रीको होस अझै खुल्न नसकेको पारिवारिक स्राेतले जानकारी दिएको छ ।
