नेपालगन्जका विद्यालय बन्द हुने भएका छन्। अत्यधिक गर्मीसँगै तातो हावा (लु) चलेकाले नेपालगन्ज उपमहानगरपालिकाले जेठ १५ देखि १८ गतेसम्म विद्यालय बन्द गर्ने निर्णय गरेको हो।
नगरस्तरीय विपद व्यवस्थापनको बैठकले गर्मी बिदा गर्ने निर्णय भएको नेपालगन्ज उपमहानगरपालिकाका शिक्षा महाशाखा प्रमुख उपसचिव गोर्खबहादुर थापाले जानकारी दिए।
नेपालगन्जमा केही दिनदेखि गर्मी बढेको छ। यहाँको तापक्रम ४१ डिग्रीभन्दा बढी रहेको छ। गर्मी अझै बढ्ने पूर्वानुमान गरिएको छ। गर्मीसँगै ‘लु’ चलेको छ।
अत्यधिक गर्मीले बाहिर काम गरेर गुजारा चलाउनेलाई धेरै प्रभाव पारेको छ। गर्मीले गर्दा नेपालगन्जमा दिउँसो बाहिर निस्किन छोडिएको छ। स्वास्थ्यकर्मीले पनि अत्यावश्यक कामबाहेक घर बाहिर ननिस्कन र पानीलगायत झोलिलो खानेकुरामा जोड गर्न आग्रह गरेका छन्।
